Aqtaýlyq Sergeı Naýmovtyń óz turǵyn úıiniń ózi turatyn qabatyndaǵy dálizge jasaǵan jóndeý, sándeý jumystary kópshilikti tańǵaldyrdy. Qaladaǵy 5-shaǵyn aýdannyń 22-úıi – kópqabatty eski úı. Turǵyn úı retinde kónerýi óz aldyna, ishki-syrtqy qabyrǵalarǵa jazylǵan bylapyt sózder men álem-jálem sýretter úıdiń sıqyn, kóńildiń surqyn qashyratyn.
Qorqynyshty kireberiske kirip-shyǵýdan júıkesi sharshap, kóńili júdegen bolýy kerek Sergeı óz qabatyn kireberisimen qosa jóndeýdi budan bir jyl buryn qolǵa alypty. Ol úshin erinbeı turǵyndar dalaǵa shyǵaryp tastaǵan qurylys qaldyqtaryn jınap, óz qabatyna tasydy. Aldymen uzyn dálizdi áktep, onan soń óz qııalymen bezendirý jumystaryna kirisken.
– Qabyrǵalar óte las edi, úıge kirgen-shyqqanda quddy bir túrmede júrgendeı áserde bolasyń. Kóp oılandym, biraq bir sátte iske kirisip kettim. Ári-beri ótkender qazir bizdiń qabatty qonaqúı me dep qalady, dep kúledi 54 jastaǵy Sergeı.
Edendi, qabyrǵalardy tutastaı túrli úlgide sándep shyqqan Sergeı ár bólikke ózgeshe mán-maǵyna berýge tyrysqan. Kafel men aǵash, tas qaldyqtary kádege jarap, bir qabattyń tolyqtaı qajetine jarap tur. Qabyrǵada teńiz aıdyny men palma aǵashyn, jarqyraǵan kúnniń beınesin bergen sheber arnaıy kartınalardy ilýdi de umytpaǵan.
Santehnık bolyp nápaqa tabatyn Sergeıdiń isine kórshileri dán rıza. Mamandyǵy qurylysshy bolmasa da óziniń qııalymen sheberligin ushtastyra eńbek etken Sergeıdiń isiniń jemisin kórshiler kórýde. Endi olar óz qabattaryna qorqyp emes qyzyǵa, qýana, tipti masattana enetin boldy. Sergeıdiń isi kópke úlgi bolyp bul isti ózge kórshiler jalǵastyrýǵa nıetti.
О́z dálizin, óz qabatyn sándeýdi elimizdegi árbir qala turǵyny estafeta retinde jalǵastyrsa deısiń...
Mańǵystaý oblysy