Keshe elorda tórinde Qazaqstan halqy Assambleıasynyń mereıtoıyna arnalǵan «Qazaqstan halqy Assambleıasyna 25 jyl: syn-qaterler, jetistikter, tájirıbe» atty halyqaralyq ǵylymı-praktıkalyq konferensııa ótti. Sharaǵa Qazaqstan halqy Assambleıasy Tóraǵasynyń orynbasary Janseıit Túımebaev, Assambleıa músheleri, qoǵam qaıratkerleri, Parlament depýtattary men zııaly qaýym ókilderi qatysty.
Konferensııada qazirgi etnosaıasat salasyndaǵy, mádenıet pen jahandaný kezeńinde toleranttylyqty qalyptastyrý máseleleri boıynsha halyqaralyq is-qımyldyń ózekti máseleleri, Qazaqstan halqy Assambleıasynyń 25 jyldyq jumys nátıjeleri men 2025 jylǵa deıingi QHA damý tujyrymdamasyn júzege asyrýdaǵy perspektıvalar talqylandy.
Assambleıa jumysyna qatysty pikir bildirgender arasynda Túrkitildes memleketterdiń yntymaqtastyq keńesi (TMYK) Bas hatshysynyń orynbasary, Qyrǵyzstannyń halyq jazýshysy S.Raev, Parlament Májilisiniń depýtaty S.Abdrahmanov, QHA Tóraǵasynyń orynbasary, «Astana qalasynyń ózbek etnomádenı ortalyǵy» QB tóraǵasy Sh.Polatov, Reseı halyqtarynyń Assambleıasy Keńesiniń tóraǵasy S.Smırnova, Qazaqstannyń Ońtústik Afrıka Respýblıkasyndaǵy Tótenshe jáne ókiletti elshisi Qanat Tumysh boldy.
Assambleıa Tóraǵasynyń orynbasary J.Túımebaev alǵysózinde Elbasy N.Nazarbaevtyń «Bizdiń barlyq jetistigimiz ben jeńisimizdiń myzǵymas tuǵyry – tatýlyq pen tutastyq. Túrli ult ókilderi bir shańyraqtyń, bir týdyń astynan tabylyp, búgingideı eńseli el, irgeli memleket atandyq», degen sózin eske salyp, «Qazaqstan memleketi óziniń tutastyǵy men turaqtylyǵyn saqtaı otyryp, áleýmettik-ekonomıkalyq damýy jaǵynan eńseli belesterdi baǵyndyrdy», dedi.
Sonymen qatar konferensııanyń Qazaqstan halqy Assambleıasynyń 25 jyldyǵy aıasynda ótip jatqanyn aıtyp, onyń elimiz úshin aýqymdy jáne mańyzdy beles ekenin atap ótti.
«Kópetnosty Qazaqstan úshin etnosaralyq kelisimdi qamtamasyz etý asa mańyzdy basymdyqtardyń birine aınaldy. Birinshiden, memleket Konstıtýsııasynda etnosaralyq jáne konfessııaaralyq qatynastar salasyn retteıtin túbegeıli normalar bar. Bizdiń elimiz áýel bastan-aq mádenıetterdiń, tilderdiń, dástúrlerdiń san alýandyǵyn tanı otyryp, azamattyq qaýymdastyq qurý jolyn tańdady.
Memleket ulttyq saıasattyń oılastyrylǵan strategııasyn iske asyra otyryp, etnosaralyq qatynastar salasyndaǵy turaqtylyqtyń kepili retinde dáıekti túrde áreket etedi. «Qazaqstan halqy Assambleıasy týraly» zań, Qazaqstan halqy Assam- bleıasynyń 2025 jylǵa deıingi damý tujyrymdamasy jáne basqa da qujattar qabyldandy.
1995 jyly qurylǵan Qazaqstan halqy Assambleıasy – irgeli ınstıtýt. Qazaqstan halqy Assambleıasy qurylǵan kúninen bastap mańyzdy qoǵamdyq ınfraqurylym qalyptastyryp, biriktirdi. Etnostardyń mádenıetin, tilderi men dástúrlerin damytý úshin jaǵdaılar jasaldy. Ulttyq teatrlar, etnostyq BAQ jumys isteıdi. Qazaqstandyq etnostardyń mádenıetin, dástúrlerin jáne tilderin damytýǵa qoldaý kórsetý maqsatynda memlekettik áleýmettik tapsyrys bólinedi», dedi ol.
J.Túımebaev Qazaqstanda etnosaralyq kelisimdi qamtamasyz etýdiń tıimdi saıası-quqyqtyq jáne ınstıtýsıonaldyq-basqarý júıesi qalyptasqanyn málimdeı kele, Assambleıanyń bastamasymen júzege asqan baǵdarlamalarǵa da toqtaldy.
«Tuńǵysh Prezıdent – Elbasy N.Á.Nazarbaevtyń qoǵamdyq kelisim men jalpyulttyq birliktiń qazaqstandyq úlgisin qalyptastyrýdaǵy jáne biregeı qoǵamdyq ınstıtýt – Qazaqstan halqy Assambleıasyn qurýdaǵy róli», «Biz – Qazaqstan halqymyz» (etnosaralyq saladaǵy memleket saıasatynyń negizindegi «Birlik kóptúrlilikte» qaǵıdasy) jáne «Saıası qýǵyn-súrginge ushyraǵan, Qazaqstanǵa jer aýdarylǵan halyqtardyń taǵdyry» taqyryptaryn qamtyǵan konferensııada tarıhshylar men jas ǵalymdar baıandama jasap, etnosaralyq qarym-qatynas pen saıasat tóńireginde oılaryn ortaǵa saldy.