Atyraýda qaýipti indettiń oshaǵy týraly derek joq. Degenmen jaqynda oblystyń bas memlekettik sanıtarlyq dárigeri Asylbek Sharovtyń qaýlysymen shekteý sharalary 28 qyrkúıekke deıin sozyldy. Mundaı shekteý sharasy 15 naýryzdan beri jalǵasyp keledi. Sebep – turǵyndar arasynda koronavırýs ınfeksııasynyń taralýyna jol bermeý.
Bas sanıtarlyq dárigerdiń qaýlysyna sáıkes shekteý sharalary jeńildetilip, kásipkerlik nysandardyń jumys isteýine, qoǵamdyq kóliktiń qatynaýyna ruqsat berildi. Biraq kúsheıtilgen kásipkerlik, ózge de salalardyń nysandaryna sanıtarlyq-dezınfeksııalyq rejim talabyn saqtaý júkteldi. Solaı desek te bas memlekettik sanıtarlyq dárigerdiń málimetine súıensek, 28 naýryzdan 9 qyrkúıekke deıin 10 975 jaǵdaı tirkeldi. Onyń ishinde indet belgileri joq – 7 685, koronavırýs belgilerimen 3 290 naýqas tirkeldi. Jazylyp shyqqandar sany – 10 876 adam. Naýqastardyń 5 230-y Atyraý qalasynda baıqalsa, Inder aýdanynda 341, Mahambette – 231, Qurmanǵazyda – 166, Maqatta – 281, Qyzylqoǵada – 426, Isataıda – 245, Jylyoı aýdanynda 4 055 jaǵdaı anyqtaldy. Al Teńiz ken ornynan – 2 984, Qulsary qalasynan 1 071 jaǵdaı belgili boldy. Al keshe, 15 qyrkúıekte qaýipti indetke shaldyqqandar sany 11 015 adamǵa jetti. Demek, shekteý sharalaryn tolyǵymen alyp tastap, arqany keńge salýdyń reti joq ekeni ańǵarylyp otyr.
Teńiz ken orny demekshi, mundaǵy qyzmetkerlerdiń densaýlyǵyn qorǵaý, qaýipsizdigin qamtamasyz etý úshin qajetti sharalar jalǵasyp keledi. «Teńizshevroıl» JShS úkimetpen jáne jurtshylyqpen baılanys bóliminiń bas menedjeri Rzabek Artyǵalıevtiń aıtýynsha, qyzmetkerler arasynda vırýs juqtyrý jaǵdaıyn anyqtaý maqsatynda olardy ýaqtyly oqshaýlaý, yqtımal qarym-qatynasta bolǵandardy anyqtaý úshin PTR synamasy alynady. «Teńizshevroıl» tarapynan júrgizilgen PTR synamalarynyń sany 73 myńnan asty. Máselen, 7 qyrkúıekke deıin Teńiz ken ornyndaǵy qyzmetkerler arasynda qaýipti indetti juqtyrýdyń 4 147 jaǵdaıy tirkelip, olardyń arasynan 2 295 adam emdelip shyqty. Al testileý qorytyndysy oń nátıje bergenderdiń negizgi bóligi Teńiz ken ornyna vahtalyq keste boıynsha bara jatqan qyzmetkerlerden turǵylyqty jerinen PTR synamasyn alý kezinde anyqtalǵan.
– Pandemııa bastalǵaly beri kompanııada sanıtarlyq talaptar tolyqtaı saqtalýda. Jumysshylardyń vahtaǵa barý, úıine oralýy kezinde PTR synamasy mindetti túrde alynady. Qazir Teńiz ken ornyndaǵy ınfeksııalyq stasıonarda koronavırýs sımptomymen 35 naýqas em alýda. Pnevmonııany juqtyrǵandar joq, – deıdi R.Artyǵalıev.
Bas menedjerdiń pikirine súıensek, ken ornynda pandemııa bastalǵan sátte 45 myń adam jumys istegen. Sáýir aıynda koronavırýs taralýynyń aldyn alý men jumysshylardyń qaýipsizdigin saqtaý maqsaty, sondaı-aq óndiristiń toqtap qalmaýy úshin birinshi qajettiliktegi emes jumysqa tartylǵan 27 myń qyzmetker Teńiz ken ornynan shyǵaryldy. Sodan keıin kenishte «taza» jáne «las» aımaqtar jasaqtalyp, tamyz aıynda 17 myńnan astam adam vahtalyq jumysqa qaıtadan jumyldyryldy. Olar arnaıy PTR testten ótkiziledi. Epıdemııalyq jaǵdaı ábden turaqtanǵan soń 45 myńnan astam adam Teńiz kenishindegi jumysyna qaıta kirisedi. Biraq munyń jańa jyldan keıin iske asatyny kútilip otyr. Jumysshylardy qysqartý bolmaıdy.
Atyraý oblystyq bas memlekettik sanıtarlyq dáriger Asylbek Sharovtyń aıtýynsha, kyrkúıektiń ekinshi jartysynan tumaýdyń epıdemııalyq maýsymy bastalady. Bul qysqa merzimdik emes, kelesi jylǵy mamyrǵa deıin sozylady. Tumaý aýrýynyń alǵashqy kezeńi óte jedel ótedi.
– Jasyryn ınkýbasııa mezgili bir-eki kúnge sozylyp, adamnyń qyzýy joǵarylaıdy. Tumaýǵa shaldyqqan adam tońǵan sııaqty bolyp, basy aýyrady. Bir mezgilde adamda álsizdik, aǵzasynda del-saldyq paıda bolyp, basy aınalady. Bulshyq etteri aýyrady, qulaǵy shýlaıdy. Murynnan jıi sý aǵý baıqalady, tamaǵy qyryp jutyndyrmaıdy. Qurǵaq qatty jótel paıda bolady. Tumaýdyń alǵashqy belgileri biline bastaǵan kezde aýrý adam oqshaýlanyp, kópshilik jınalatyn orynǵa barmaýy kerek. Jaqynyna janashyr bolýdy oılaǵan ár turǵyn osy shekteýlerdi saqtasa ǵana qaýipti indettiń tirkelýi toqtaıdy, – deıdi A.Sharov.
Onyń aıtýynsha, aýrýdy aldyn alýdyń birden-bir joly – tumaýǵa qarsy ekpe alý. Ony kúzde bastaýdyń tıimdiligi zor. Sol sebepten Atyraý oblysyna bıyl tumaýǵa qarsy 60 myń dana ekpe jetkizildi. Satyp alynǵan vaksınany tegin alatyndardyń tizbesi túzilgen. Oǵan medısına qyzmetkerleri, medısınalyq uıymdarda medısınalyq baqylaýǵa alynǵan balalar, alty aıdan asqan kóp aýyratyn balalar, jetim balalar men ata-anasynyń qamqorlyǵynsyz qalǵan balalarǵa arnalǵan bilim berý uıymdary men sábıler úıleriniń tárbıelenýshileri, medısınalyq-áleýmettik mekemelerdiń qyzmetin alýshylar, júktiliktiń ekinshi nemese úshinshi trımestrindegi júkti áıelder, júrek-qan tamyr júıesiniń, tynys alý músheleriniń sozylmaly aýrýyna shaldyqqandar jatady.
Jaqynda oblystyq densaýlyq saqtaý basqarmasynyń basshysy Nurlybek Qabdyqaparov Qurmanǵazy aýdanyna arnaıy dárigerler brıgadasyn ertip bardy. Brıgada quramynda nevropatolog, hırýrg-ortoped, LOR, kardıolog, okýlıst, ftızıatrlar bar. Olar aýdan aýmaǵyndaǵy birneshe eldi mekende 358 adamdy qabyldap, medısınalyq keńes berdi. Medısına qyzmetkerlerimen kezdesýde pandemııamen kúreske jumyldyrylǵan medısına mamandaryna ústemeaqy, ótemaqy tóleý máselesine, avtokólikpen qamtý, koronavırýs ınfeksııasynyń ekinshi tolqynyna daıyndyq jaıy keńirek talqylandy.
– Qazir aýdandyq ortalyq aýrýhanada ottegi stansasy salynyp jatyr. Stansada otteginiń úzdiksiz óndirilýi qamtamasyz etiledi. Bul ottegi ballondaryn tasymaldaýdy joıý úshin qolǵa alyndy. Qazir aýdandaǵy densaýlyq saqtaý mekemelerinde jeke qorǵanysh zattary, dári-dármek qory jetkilikti. Azǵyr aýylyndaǵy dárigerlik pýnktke úsh ottegi konsentratoryn ákelip berdik, – deıdi basqarma basshysy N.Qabdyqaparov.
Atyraý oblysy