Epıdemııalyq ahýalǵa baılanysty álem jurtshylyǵy qashyqtan jumys isteýge ábden beıimdeldi. Onlaın konferensııalar, jelidegi jınalystar, ekrannyń eki jaǵynda otyryp jasalatyn túrli mámile men jıyndar kúndelikti ómirimizdiń bir bólshegine aınalǵandaı. Osy oraıda paıdaǵa jarap, álemdegi barlyq onlaın basqosýlardyń basynda turǵan «ZOOM» beıneqońyraýlar men konferensııalar qosymshasy ekeni de belgili.
Tipti pandemııa bastalǵaly qosymshany qoldanýshylar sany kúrt artqan. Bul jaǵdaı sarapshylardy alańdatyp otyr. Kóptiń kóńilinen shyǵyp júrgen platformanyń zııany da joq emes.
Zoom paıdalanýshylarǵa ne úshin qaýipti? Jobanyń osal tusyn Bleeping Computer bylaı dep túsindiredi: Windows arqyly ZOOM paıdalanýshylarynyń deregi jıi urlanady. Másele mynada, platforma chattaryndaǵy Windows UNC joldary (ıaǵnı faıl joldary) gıpersiltemelerge aınalady. Paıdalanýshy olarǵa kirgen kezde júıe avtomatty túrde NTLM logıni men hesh parolin jiberedi. Eshteńeden kúdigi joq paıdalanýshy, osylaısha jeke málimetin hakerlerge ońaı tarata salǵanyn ózi de baıqamaı qalady. Bul basty problema emes. Osyǵan deıin birneshe álemdik basylym Zoom paıdalanýshylarynyń jeke konferensııalaryna bóten adamdardyń shabýyl jasap, ońaı enip kete alatyndyǵyn da jazǵan. Keıingi kezderi osyndaı shabýyldyń qurbany bolǵan qoldanýshylar sany artty. Tipti basqa adamdardyń chatyna kirip, qatysýshylarǵa balaǵat sóz aıtyp, resmı jıyndardy mazaqqa aınaldyrǵan jaǵdaılar da tirkelgen. Osyndaı máselelerge baılanysty ZOOM platformasy paıdalanýshylar úshin qaýipti dep tanylǵan edi.
Kompanııa onlaın-shabýyldardyń jıileýi men qaýipsizdik sharalary júıelenbegenin moıyndap otyr. Tipti Zoom negizin qalaýshy Erık Iýan kompanııa atynan paıdalanýshy derekteri men olardyń qaýipsizdigine qaýip tóndirgeni úshin keshirim suraǵan.
Kóp uzamaı platforma qaýipsizdigine baılanysty tıisti sharalar da qarastyryldy. Máselen, qazir toptyq beıneqońyraýlardyń qaýipsizdik júıesine eń mańyzdy eki fýnksııa engizildi. Olar: konferensııaǵa qosylý úshin parol engizý jáne kútý bólmeleri. Iаǵnı konferensııaǵa qatysýshylar suranys jibergen adamdy kútý bólmesine qoıyp, chatqa kirýge tyıym sala alady nemese jıynǵa qosa alady.
Kompanııa barynsha tıisti sharalar atqarǵanymen, mamandar bul túzetýlerdiń ózi baǵdarlamanyń qaýipsizdigine jaýap bere almaı otyrǵanyn aıtady. О́ıtkeni ZOOM qoldanýshylary josparlaǵannan birneshe esege kóp. Al arada qansha ýaqyt ótse de, platformany almastyra alatyn balama áli jasalmady.