"Aq altynnyń" otany sanalǵan Maqtaaral aýdanynda maqta terimi bastaldy. Eń birinshi bolyp Jambyl aýyldyq okrýgine qarasty Mahantaev Orynbasar basshylyq jasaıtyn "Araı" sharýa qojalyǵy alajazdaı ósirgen ónimin jınap bastady, dep habarlaıdy Egemen.kz Maqtaaral aýdany ákiminiń baspasóz qyzmetine silteme jasap.
5,5 gektar jerge "Maqtaaral 4017" maqta sortyn ekken qojalyq 27 sentnerden ónim alýda. Maqta terimine jergilikti aýyl turǵyndary qatysyp, kelisine 30 teńgeden eńbekaqylary tólenýde. Qojalyq basshysy jınaǵan ónimin "Keńesshil" maqta qabyldaý beketine ótkizbekshi eken.
Bıyl maqtaaraldyq sharýalar jalpy 38,2 myń gektar jerge maqta shıtin sebken bolatyn. Mine, kúz kelip, dıqandarymyz qyrmanyn "aq altynǵa" toltyrýdy bastap ketti. "Kúzgi jıyn-terim naýqanyn sátti ótkizý - bárimizdiń ortaq mindetimiz" degen bolatyn aýdan ákimi Baqyt Asanov.
Búginde aýdan boıynsha maqta terim naýqanyna 15 brıgada, 403 terimshi qatysýda. Qazirgi tańda negizinen qol terim jumystary júrgizilip, 125 gektar maqta alqabynan 269,5 tonna "aq altyn" qambaǵa jınaldy.
Maqta terim naýqanyna daıyndaý úshin kombaındarǵa jóndeý jumystary tolyqtaı júrgizilgen. Qosymsha aýdanymyzǵa AQSh-tan 23 dana "Djon-Dır" maqta terim kombaıny satyp alynǵan. Sondyqtan, byltyrǵyǵa qaraǵanda bıyl maqta terim kombaındarynan qıyndyqtar týmaıdy. Osynyń arqasynda maqtany mashınalyq ádispen terý 66%-ǵa jetetin bolady. Jalpy bıylǵy maqta terim naýqanyna 514 dońǵalaqty traktor, 1206 tirkeme jáne 151 kombaın qatysady dep kútilýde.
Byltyr aýdanda maqta óndiretin 5 zaýyt jáne maqta qabyldaıtyn 60-tan astam beket sharýalarǵa qyzmet kórsetken edi. Bıyl da bul óndiris oryndary jıyn-terim naýqanyna daıyndalýda. Sondaı-aq, kúzgi dala jumystaryn júrgizýge memleket tarapynan jeńildetilgen baǵamen janar jaǵarmaı sharýalarǵa taratylýda.