Memleket basshysy Qasym-Jomart Toqaev onlaın rejımde ótip jatqan Qazaqstan mashına jasaýshylarynyń VIII forýmy qatysýshylaryna quttyqtaý hat joldady. Hatty "Qazaqstannyń mashına jasaýshylar odaǵy" zańdy tulǵalar birlestigi basqarmasynyń tóraǵasy Meıram Pishembaev oqyp berdi, dep habarlaıdy Egemen.kz.
"Qurmetti forýmǵa qatysýshylar! Sizderdi Qazaqstan mashına jasaýshylarynyń VIII forýmynyń ashylýymen quttyqtaımyn. Forým memleket pen bıznestiń júıeli dıalogyna, mashına jasaý salasynyń ózekti máselelerin sheshý arnalǵan alańǵa aınaldy. Bıyl is-sharalardyń kópshiligi onlaın rejımde ótedi. Osy forým men onyń aıasynda ashylǵan mashına jasaý jáne metall óńdeý jónindegi birinshi halyqaralyq onlaın-kórme de erekshelik emes. Pandemııamen baılanysty kúrdeli ekonomıkalyq kezeńge qaramastan, otandyq mashına jasaý isi ósý qarqynyn kórsetýde – bıyl 14%-ǵa ósti. Osy kórsetkish boıynsha mashına jasaý elimizdiń barlyq óńdeý sektory boıynsha jetekshi orynǵa shyqty. Bıylǵy Joldaýymda men ártaraptandyrylǵan, tehnologııalyq turǵydan damyǵan ekonomıka qurý, óńdeý ónerkásibi óndirisiniń kólemin bir jarym esege ulǵaıtý jóninde mindetter qoıdym. Bul úshin memleket otandyq óndirýshilerdi qoldaý tetikterin jetildiredi, ónerkásiptik saıasat týraly zań qabyldanady. Qazirgi zaman bolmysynda Qazaqstannyń mashına jasaý salasy qarqyndy damýyn jalǵastyratynyna senimdimin. Salanyń óndiristi keńeıtý jáne eksportty ulǵaıtý úshin eleýli áleýeti bar. Barshańyzǵa jemisti qyzmet jáne alǵa qoıǵan maqsattarǵa jetýde tabys tileımin", delingen Memleket basshysynyń quttyqtaý hatynda.