Soltústik Qazaqstan oblystyq polısııa departamentiniń baspasóz qyzmetinen kelgen myna habarǵa tańǵalmasqa lajyń joq. Onda Esil aýdanynyń bir turǵyny aýdandyq aýrýhanaǵa kelip, dárigerlerdi uryp, «jedel járdem» kóligin aıdap áketpek bolǵany týraly aıtylady.
Polısııanyń habaryna qaraǵanda, 37 jastaǵy adam masań kúıde «jedel járdem» kóligin shopyrynan tartyp alyp, minip ketken. Sosyn basqa jerde turǵan «VAZ 2121» qyzmettik avtokóligine soǵylyp, toqtaǵan. Júrgizýshini de soqqyǵa jyqqan. Shaqyrtý boıynsha jetken ýchaskelik polısııa ınspektory buzaqyny kúshpen ustaǵan.
Esil aýdany polısııa bóliminiń bastyǵy, podpolkovnık Erlik Eslámbekov atalǵan fakti boıynsha sotqa deıingi tergep-tekserýdiń sharalary bastalǵanyn málim etti. «Quqyq buzýshy Qylmystyq kodekstiń «Avtomobıldi nemese ózge de kólik quralyn jymqyrý maqsatynsyz quqyqqa syıymsyz ıelenip alý» týraly 200-baby boıynsha aıyptalýda. Sonymen qatar oǵan Ákimshilik quqyq buzýshylyq týraly kodekstiń «Júrgizýshiniń kólik quralyn alkogoldik, esirtkilik jáne (nemese) ýytqumarlyq masań kúıde basqarýy», sol sııaqty «kólik quralyn alkogoldik, esirtkilik jáne (nemese) ýytqumarlyq masań kúıdegi adamnyń basqarýyna berý» baby boıynsha hattama toltyryldy. Sotqa deıingi tergeý 20 táýlik ákimshilik qamaý jazasyn ótegennen keıin jalǵasatyn bolady. Júrgizýshini soqqyǵa jyǵý faktisi boıynsha prosessýaldyq sheshim sot-medısınalyq saraptamasynan keıin qabyldanatyn bolady», dedi ol.
Soltústik Qazaqstan oblysy