Álemdi ábigerge salǵan pandemııa kezinde Batys Qazaqstan oblysyndaǵy Bórli aýdany indetke qarsy bir kisideı jumylyp, uıymshyldyq kórsetti. Qıyn kezeńde aýdanda 2 myńnan asa otbasy materıaldyq jáne áleýmettik kómek alǵan.
«Jumyla kótergen júk jeńil» degen maqaldyń maǵynasy dál osy indet jaılaǵan qıyn kezde anyq bilindi. О́ńirde ekonomıkalyq jaǵynan eń damyǵan, qazynaly Qarashyǵanaq kenishi ornalasqan aýdan úshin de ońaı bolǵan joq. Aýdandaǵy aýrýhanalar lyq tolyp, naýqastar bir jutym aýaǵa zar bolǵan kez esten shyǵar ma? Osynaý qıyn kezde kásipkerler men janashyr turǵyndar jumylyp, az ýaqyt ishinde aýdandyq aýrýhanaǵa 47 ottegi konsentratoryn jetkizdi. Bul úlken járdem bolatyn.
«Pandemııa kezindegi qıynshylyqty el bolyp jeńip shyqtyq» deıdi Bórli aýdanynyń ákimi Mırjan Satqanov.
Koronavırýs indetiniń alǵashqy tolqyny ótken sol kezeńde Bórli aýdany aýmaǵynda uıymdastyrylǵan provızorlyq jáne ınfeksııalyq stasıonarlarǵa 523 naýqas jatqyzyldy. Búginde barlyq stasıonar jabylyp, medısına mekemeleri ádettegi jumys rejimine kóshken.
Karantın kezinde bórlilik eriktiler erekshe belsendi boldy. Olar 20 myńnan astam betperde tigip taratty. 2 myńnan astam muqtaj otbasyna materıaldyq jáne áleýmettik kómek kórsetildi. Aýdannyń shaǵyn jáne orta bıznes ókilderi indetke qarsy kúresip jatqan medısına qyzmetkerlerine arnalǵan turǵyn úı qalashyǵyn, karantındik stasıonarǵa arnalǵan qonaqúı ǵımarattaryn tegin paıdalanýǵa berdi.
«Qarashyǵanaq Petroleým Opereıtıng B.V» kompanııasy da osyndaı demeýshilik isten bas tartpady. Covid-19 indetin anyqtaıtyn kúrdeli zerthana, ókpeni jasandy jeldetkish apparattary, medısına qyzmetkerlerine arnalǵan jeke qorǵanys quraldary, jedel testter jáne «Jedel járdemniń» 2 avtokóligi aýdandyq aýrýhanaǵa tabystaldy. «QazBýrGaz» jáne «Aqsaı ındýstrıaldy parki» kompanııalary da aýdandyq aýrýhanaǵa 2 avtokólik syılady. Dári-dárimek tapshylyǵy kezinde «Syrlasý», «Aqsaı market», «AırGrýpp» jáne «Aqsaı Stroı Servıs ı K» kompanııalarynyń kúshimen aýdandyq aýrýhanaǵa jalpy somasy 12 mln teńgege dári-dármek pen preparat satyp alynǵan eken. Al «Avtodom-M» jáne «Vest Motors Servıs» kompanııalary der kezinde sapaly medısınalyq kómek kórsetý maqsatynda qurylǵan mobıldik brıgadalardy qajetti avtokóliktermen qamtamasyz etti. Jaqynda ǵana «MontajSpesStroı» jáne «Bonattı» kompanııalary aýdandyq aýrýhanaǵa taǵy da syı jasap, ókpeni jasandy jeldetetin 2 dana apparat tabys etti.
Sonymen qatar pandemııa kezinde jergilikti bıýdjet qarajaty esebinen aýdan aýmaǵynda jyljymaly 4 mobıldik beket ornalasty. Ol beketterde qyzmet etken dárigerler men quqyq qorǵaý organdarynyń qyzmetkerleri 3 mezgil ystyq tamaqpen qamtamasyz etildi. Stasıonarlardaǵy qyzmetkerler de jeke qorǵanys quraldarymen qamtylyp, Aqsaı qalasy men aýyldardyń adam kóp shoǵyrlanatyn oryndarǵa – aıaldamalar, saıabaqtar, jaıaý júrginshi joldary men kópqabatty úılerdiń kireberisterine dezınfeksııa jumysy júrgizildi.
– Syn saǵatta kórsetken batyldyq men tózimdilik úshin barsha medısına jáne quqyq qorǵaý salasy qyzmetkerlerine, eriktilerge, kásipkerlerge alǵys aıtamyn. Indetke qarsy kúreste sizder qosqan úleske baǵa jetpes. Búgingi kúnniń batyry – sizdersizder! – dedi jaqynda telearna arqyly sóz alǵan aýdan basshysy M.Satqanov.
Iá, birligi jarasqan el qandaı qıyndyqty da eńseredi.
Batys Qazaqstan oblysy