Mádenıet jáne sport mınıstrliginiń Til saıasaty komıteti Sh.Shaıahmetov atyndaǵy "Til-Qazyna" ulttyq ǵylymı-praktıkalyq ortalyǵynyń uıymdastyrýymen Qazaqstan halqy tilderi aıasynda ótken "Til sheberi" respýblıkalyq onlaın baıqaýy óz máresine jetti, dep habarlaıdy Egemen.kz
Til saıasaty komıtetiniń tóraǵasy Ádilbek Qaba qatysýshylardy quttyqtap, memlekettik tildiń mártebesine aıryqsha toqtaldy: "Shet eldermen halyqaralyq baılanys artqan saıyn, kóp til biletin jas urpaq tárbıeleý qajettiligi de kún tártibine shyqty. Bul baıqaýdyń basty maqsaty jahandyq órkenıet pen elimizdiń damý baǵytyna saı úsh tildi – qazaq, orys jáne aǵylshyn tilderin jetik meńgergen, jan-jaqty bilimdi jastardy anyqtap, qoldaý kórsetý. Biraq, bir nárseni basa aıtqym keledi, ana tiliń árqashan bıikte turýy kerek. О́ıtkeni, ult ustazy Ahmet Baıtursynov aıtqandaı, "tili joǵalǵan ulttyń ózi de joǵalady». Ǵalymdardyń esepteýinshe, árbir on tórt kún saıyn bir til joǵalyp otyrady eken. Syrttan eshkim kelip, tyıym salyp jatqan joq. Qoldanys aıasy kemigendikten órisi tarylady. Sol sekildi kúndelikti turmysta qazaq tilin ekinshi kezekke ysyra bersek, qoldanystan eriksiz shyǵatyn sóz qatary kóbeıe beredi. Sondyqtan, ana tilimizdiń abyroıyn asqaq ustańyzdar", dedi ol.
Til báıgesine elimizdiń túkpir-túkpirinen 16 úmitker qatyssa, baıqaýdyń ár kezeńine kásibı saraptama jasap, baǵa bergen qazylar alqasy talantty jastar qatary ósip kele jatqanyna toqtaldy. Olardyń pikirinshe, jarysqa qatysýshylar aǵylshyn tilin jaqsy meńgergen, al ana tilinde esse jazý barysynda shuraıly oıyn shyraıly etip beıneleı alǵany qýantarlyq eken.
Shara moderatory Sh.Shaıahmetov atyndaǵy "Til-Qazyna" ulttyq ǵylymı-praktıkalyq ortalyq dırektorynyń orynbasary Aıdos Ábdihalyq jastarmen ekspress-suqbat uıymdastyryp, olardyń elimizdegi tildik ahýal boıynsha ózara pikir almasýyna múmkindik týdyrdy. Ara-arasynda ónerge kezek berip otyrdy. Munyń bári saıystyń tartymdy, ózara tyǵyz baılanysta ótýine ıgi áser etti.
Qazylar alqasynyń sheshimi boıynsha júlde qory 300 myń teńgelik bas júldeni qostanaılyq Súleımen Berikbaıulynyń qanjyǵasyna baılansa, birinshi oryndy almatylyq azamat Abzalbek Ádilhan ıelenip, 250 myń teńge syılyq aldy. Ekinshi oryn men 150 myń teńge syılyq Almaty oblysynyń jas turǵyny Qanat Jaqsybaevqa buıyrdy. Úshinshi oryndy Shymkent qalasynan kelgen Aqerke Bekbolatova men Qaraǵandy oblysynyń úmitkeri Ámirhan Oralbekov bólisip, árqaısysy 100 myń teńge oljaǵa ıe boldy. Bulardyń syrtynda belsendilik tanytqan aqtóbelik Narqozy Esenkeldiuly, kerekýlik Maqpal Erkinqyzy, jambyldyq Aldııar Baýyrjanuly 50 myń teńge syılyq jáne Alǵys hatpen marapattaldy.