Búgin oblys ákimi Gúlshara Ábdiqalyqova jumys saparymen Syrdarııa aýdanyna bardy, dep habarlaıdy Egemen.kz.
Aldymen aımaq basshysy Áıtek sý torabynyń jumysymen tanysty. Syrdarııa ózenindegi "Áıtek" sý toraby 2004 jyly "Syrdarııa ózeniniń arnasyn retteý jáne Aral teńiziniń soltústik bóligin saqtaý" jobasy aıasynda salynyp, paıdalanýǵa berilgen. Negizgi maqsaty – Syrdarııa ózeniniń aǵynyn retteýge, Syrdarııa jáne Jalaǵash aýdandarynyń 16 myń gektar sýarmaly jerlerin sýmen qamtamasyz etý. Qurylǵy sekýndyna 750 tekshemetr sý ótkizedi. Biraq, Sarats-1 jobasy sheńberinde salynǵan sý toraby sońǵy jyldary syr bere bastaǵan.
Qazir "Áıtek" sý toraby avarııalyq jaǵdaıda. Oń jaǵalaýdy shaıyp ketý qaýpi bar. Osyǵan oraı, joba-smetalyq qujattar ázirlenip, Ekologııa, geologııa tabıǵı resýrstary mınıstrligi arqyly tıisti qarjy bólindi. Endigi maqsat qarajatty durys ıgerip, sý torabyn qalypqa keltirý jumystaryn sapaly júrgizýimiz kerek, dedi Gúlshara Ábdiqalyqova.
Aımaq basshysy aýdan ákimi Talǵat Dúısebaevqa sý torabynda kúrdeli jóndeýdi bastaý maqsatynda tıisti sheshimder qabyldap ýaqytyly oryndaýdy tapsyrdy.
Sondaı-aq, óńir basshysy Aqjarma aýylyndaǵy "Aýyl – el besigi" baǵdarlamasy aıasynda atqarylyp jatqan jumystardy tekserip, "Aqjarma" fermerlik qojalyǵynyń kúrish tazalaý qurylǵysyn kórdi.
Atalǵan memlekettik baǵdarlama aıasynda eldi mekenniń jalpy uzyndyǵy 13,6 shaqyrym bolatyn 9 kóshesin ortasha jóndeýge 614,64 mln teńge bólindi. Munymen qosa, aýylynyń 4 kóshesin jaryqtandyrýǵa, 3 kóshesine temir betondy lotok ornatýǵa qarjy bólinip, jumystar júrgizilýde. Tıisti jumystardy "Syr joldary" JShS atqarýda. Aımaq basshysy aýdan ákimi men merdigerge jóndeý jumystaryn tezdetip aıaqtaýdy jáne sapaly oryndaýdy tapsyrdy.
«Aqjarma 2» fermerlik qojalyǵy "Qarapaıym zattar ekonomıkasy" baǵdarlamasy aıasynda 56 mln teńge nesıe alǵan. Chehııadan arnaıy qurylǵy ákelip, kúrish tazalaıtyn zaýytty iske qosty. Qazir zaýyt óz tıimdiligin kórsetip tur. Apparat saǵatyna 50 tonna astyqty tazartady. Sharýashylyqty ártaraptandyrý arqyly 2023 jylǵa deıin kúrish aqtaıtyn zaýyt, pasterlengen sút zaýyty, jylyjaı jáne kókónis qoımasyn salýdy josparlap otyr.
Sapar sońynda oblys ákimi aýdannyń kúzgi dala jumystarymen tanysty. Atap aıtqanda, Shaǵan aýylyndaǵy "Shaǵan Jer" JShS-nyń №1 óndiristik brıgadasynyń egis alqabyna jáne Naǵı Ilııasov aýylyndaǵy «Maǵjan ı K» JShS-niń astyq tazalaý qyrmanyna bardy.
"Shaǵan Jer" JShS 2004 jyly qurylǵan. Negizgi baǵyttary – egin egý jáne mal sharýashylyǵy ónimderin óndirý. Sharýashylyqta 350 adam jumyspen qamtylǵan. Aýyl sharýashylyǵy jeri – 16439 gektar.
Al, Naǵı Ilııasov aýylyndaǵy "Maǵjan ı K" JShS-niń astyq tazalaý qyrmany saǵatyna 5 tonna kúrish tazalaıdy. Eki aýysymnan 40 adam jumys isteıdi. Oblys ákimi jumysshylarmen de kezdesti. Sýshy Arysbek Baınazarov memleketten jeńildetilgen nesıe alyp, mal basyn kóbeıtip otyrǵanyn aıtty. Bıyl egini bitik bolyp, 80 sentnerden joǵary ónim alǵan. Al brıgadır Shýhrat Bızahov on jyldan beri 70-75 sentnerden ónim alyp kele jatqanyn jetkizdi. Onyń aıtýynsha, jumysshylardyń ótinishi boıynsha sharýashylyq olarǵa jem-shópterin tegin berip jatyr.
Aımaq basshysy aýdan ákimine egin jumystaryn 15 qazanǵa deıin aıaqtaýdy jáne jylý maýsymyna daıyndyq jumystaryn pysyqtaýdy tapsyrdy.
Qazirgi basty máseleler egin jınaý naýqany men qysqy mezgilge daıyndyq. Sondyqtan aýdandardy aralap, kúzgi egin jınaý naýqanynyń qalaı ótip jatqanyn, jylý maýsymyna daıyndyq jumystaryn tekseretin bolamyz. Jalpy aýdanda búgingi tańda 30 paıyz egin jınalǵan. Bul jumystar ýaqytyly bitedi dep josparlanýda. Al, aýdandyq aýrýhananyń jylý júıelerinde birqatar máseleler bolǵan. Búgingi tańda jóndeý jumystary júrgizilýde. Qazandyqty aýystyryp, jylý qubyrlaryn jańartý 10 qazanǵa deıin bitýi kerek, dedi oblys ákimi.