Jańa tolqynǵa daıyndyq qyzý júrýde

Nur-Sultan qalasy Qoǵamdyq densaýlyq saqtaý bas­qar­masynyń habarlaýynsha, qa­lada epıdemııalyq jaǵdaı turaqty. Basqarma ákimdikpen birlesip kúzgi-qysqy kezeńdegi COVID-19-dyń aldyn alý jáne emdeý is-sharalarynyń josparyn jasady. Atap aıtqanda, alǵashqy medısınalyq-sa­nı­tar­lyq kómek uıymdarynyń deńgeıinde COVID-19 sımp­tom­syz jáne jeńil túrde aýyr­ǵan naýqastarǵa, indet juq­tyr­ǵandarmen baılanysta bol­ǵan­darǵa qashyqtan bas­qarý bo­ıynsha jumys uıym­das­ty­ry­­lady. KVI jáne pnevmonııa­men aýyratyn naýqastarǵa úı jaǵdaıyndaǵy aýrýhanalar uıymdastyrý, olarǵa aqysyz dári-dármekter berý qa­ras­ty­ryl­ǵan.

«Qalanyń barlyq emhanalarynda mobıldi toptardyń jumysy pasıentterge úıge barý arqyly qyzmet kórsetý jumysy uıymdastyryldy. Indetke kúdikti naýqastardan koronavırýstyq ınfeksııaǵa úıden PTR test alý qarasty­ryl­ǵan. Olardyń sany 207-ni quraıdy», deıdi basqarma bas­shy­synyń orynbasary Álııa Rústemova.

Sondaı-aq 50-den astam ókpeni jasandy tynystandyrý appa­raty, 2 kompıýterlik tomograf, ókpeniń zaqymdaný paıyzyn kórýge múmkindik beretin 7 sandyq rentgen júıesi, 3 ottegi rezervýary qosymsha satyp alynǵan. Qalanyń emdeý mekemelerine 500-den astam ottegi konsentratory, 250-ge jýyq ókpeni jasandy tynystandyrý apparaty, 300-ge jýyq floýmetr, 500 kópfýnksıonaldy arnaıy kereýet jetkizildi. 1600-ge jýyq ottegi núktesi bar.

Jalpy, COVID-19 koro­na­vırýstyq ınfeksııamen kúresýdiń 3 kezeńine jospar qurylǵan. Atap aıtqanda, 1-kezeńde 5 medısınalyq uıymnyń bazasynda 1645 tósektik oryn ornalastyrý josparlanýda. Sonymen qatar kópsalaly medısınalyq uıymdar jedel qabyldaý jáne naýqastardy josparly túrde qabyldaýdy jalǵastyrady. 2-kezeńde birqatar respýblıkalyq klınıkalarda qosymsha 1500 tósek ornalastyrý qarastyrylǵan. Al 3-kezeń tósekterdi tek qa­la­lyq aýrýhanalar men emha­na­larda ǵana emes, sonymen qatar qonaqúı keshenderi men jataqhanalardyń beıim­del­gen bólmelerinde ornalas­ty­rý kózdelýde. Sanıtarlyq dárigerlerdiń tekserýinen keıin birqatar medısınalyq uıym «kovıdtik aýrýhanalarǵa» rezervte tur.

Álııa Rústemovanyń aı­týynsha, munyń barlyǵy 5600-deı oryn, onyń 465-i – reanımasııalyq oryn.

Jaqyn arada medısınalyq jabdyqtardan basqa jyljymaly flıýorografııalyq keshender, sıfrly rentgen júıeleri jáne joǵary dáldiktegi jel­det­­kishter de keledi. Búginde sta­sıo­narlardyń shamamen 94%-y ókpeni jasandy tynystandyrý apparatymen qamtamasyz etilgen.