Dúnıejúzilik densaýlyq saqtaý uıymy azyq-túlik óndirýshi kompanııalardy 2023 jylǵa qaraı maı qyshqylynyń transızomerlerin paıdalanýdan tolyqtaı bas tartýǵa shaqyrdy.
Uıymnyń bas dırektory Tedros Adanom Gebreıesýs: «Búkil álem COVID-19 indetimen kúresip jatqan kezde biz halyqtyń densaýlyǵyn qorǵaýǵa bar kúshimizdi salýymyz kerek. Bul qatarda ınfeksııalyq emes aýrýlardyń aldyn alýda bar», dep málimdedi.
DSU-nyń derekteri boıynsha ónerkásipte transmaılardy qoldaný jyl saıyn jarty mıllıonǵa jýyq adamnyń ólimine sebep bolady eken. Sebebi transmaılar júrek-qan tamyrlary aýrýyn qozdyratyny medısınada dáleldengen. Sol sebepti búgingi tańda álemniń 58 memleketi 2021 jyly óz terrıtorııasynda adamdardy transmaılardan qorǵaý týraly arnaıy zań da shyǵarǵan. Alaıda DSU azyq-túlik óndirisinde transmaı qoldanatyn 100 eldegi jaǵdaıǵa alańdap otyr. Azamattarynyń zııansyz azyq-túlik tutynýyna jetkilikti jaǵdaı jasamaı otyrǵan elderdiń qatarynda Ázerbaıjan, Bangladesh, Býtan, Mysyr, Úndistan, Iran, Meksıka, Nepal, Pákistan jáne Ekvador syndy elder bar.
Bir aıta keterligi, halqynyń transmaıdy az tutynýyna jaǵdaı jasaǵan elderdiń bárinde turǵyndardyń jan basyna shaqqandaǵy tabys mólsheri joǵary eken. Jan basyna shaqqandaǵy tabysy az elderdiń birde-biri áli kúnge olardan úlgi almapty.
2018 jyly DSU REPLACE baǵdarlamasyn qolǵa alǵan-dy, sonyń aıasynda transızomerlerden túpkilikti bas tartý kózdelip otyr. Tabıǵı transızomerler, ıaǵnı transmaılar et, sút taǵamdarynda az mólsherde kezdesetinin aıta ketý kerek. Al margarın, chıpsi syndy taǵamdardyń quramynda óte kóp.