Toǵyz jasar bala Almatydaǵy Fýrmanov shyńyna kóterilý kezinde bıiktikten qulap, jaraqat aldy, dep habarlaıdy Egemen.kz.
"20 qyrkúıek kúni saǵat 13:36-da Fýrmanov shyńynan 109 qutqarý qyzmetine shaqyrtý tústi. Toǵyz jasar bala bıiktikten qulap ketken. Oqıǵa ornyna avarııalyq-qutqarý jasaǵy qutqarýshylarynyń ekıpajy, sondaı-aq jedel járdem brıgadasy men Medeý aýdandyq polısııa basqarmasynyń jedel - tergeý toby jiberildi", delingen habarlamada.
Qutqarýshylar joldyń ortasyna kólikpen jetip, taý jolynyń tar bolýyna baılanysty ary qaraı Fýrmanov shyńyna jaıaý kóterildi.
"Oqıǵa ornyna jetken qutqarýshylar alǵashqy medısınalyq kómek kórsetti. Balanyń oń qoly synǵan bolýy múmkin degen kúdikpen medısınalyq shınalar saldy. Osydan keıin qutqarýshylar toby zardap shegýshini jedel járdem kóligine deıin evakýasııalady. Qutqarý jumystary saǵat 18.20-da aıaqtaldy", dep túsindirdi ákimdik ókilderi.
Dárigerler balany shuǵyl medısınalyq kómek ortalyǵyna jatqyzdy.