"El ishi – óner kenishi" degen sózdiń bekerge aıtylmaǵanyn osy bir alaqandaı aýyldyń mádenı ómirine qarap aıtýǵa ábden bolady. Ol aýyldyń ataýy – Qarakemer. Almaty oblysynyń Eńbekshiqazaq aýdanyna qarasty eldi mekende eńbek kórigimen qatar rýhanıııat alaýy da esh sónbegen eken. Qazir aımaqtaǵy jalǵyz balalar teatry atalyp júrgen óner ujymy da osy aýylda qurylyp, býynyn qataıtqan, dep habarlaıdy Egemen.kz
- Bizdiń Qarakemer aýyly ejelden qaınaǵan eńbektiń, jaınaǵan ónerdiń ólkesi atanǵan jer. Bul kıeli jerdiń topyraǵynan talaı dúldúlder men bulbuldar, sportshylar men batyrlar túlep ushqan. Aıadaı ǵana aýyldan Keńes Odaǵynyń qos birdeı batyry – Qashaǵan Jamanqaraev pen Rahymjan Toqataev esimdi erler shyqqan. Kórikti mekende kompozıtor Qýat Shildebaev týǵanyn maqtanyshpen aıtamyz. Týǵan jerine janashyrlyq tanytyp júrgen atpaly azmattar da barshylyq. . Ol tizimniń basynda belgili memleket jáne qoǵam qaıratkeri, Májilisiniń depýtaty Zaǵıpa Balıeva turǵanyn aıtqan oryndy. Endi osyndaı aýyldyń tynys-tirshiligi gúldep, mádenıeti máýelep turýy zańdylyq qoı, deıdi Qarkemer mádenıet úıiniń dırektory Araılym Mamyrbekova.
Araılymnyń ózi oblys ortalyǵyndaǵy qyzmetin tastap, aýylǵa oralǵan eken. 2014 jyly kúrdeli jóndeýden ótip, halyq ıgiligine berilgen aýyldaǵy mádenıet úıiniń tizginin ustaýǵa usynys túskende birden kelisken. О́ıtkeni, aýyl azamattary el rýhanııatyn kóterýge basa mán berip, alystan attaı qalap aldyrǵan mamandardyń baspana máselesin birden sheship beripti. Sol jyldan bastap aýyldyń aqsap turǵan mádenıeti óz súrleý jolyn salyp, ózgeshe beleń aldy. Ashylǵan jyly-aq óner qazanynda qaınap, óz isteriniń kásibı mamandary jasaqtalyp, Mádenıet úıi erekshe leppen jumysyn bastap ketti. Mádenıet úıiniń dırektory Araılym Mamyrbekqyzy óz jumysyn aýyldaǵy ónerli ájelerdiń basyn qosyp, «Injý-marjan» halyq ansamblin qurýdan bastaıdy. Sondaı-aq, osy jyly aýyldyń daryndy jastarynan quralǵan «Kemersaz» etnofolklorlyq ansambl dúnıege keledi. Jyldarmen birge joǵary órlegen Mádenıet úıinde qazirgi tańda 12 shtattyq birlik jumys istep tur. Onyń jeteýi kásibı maman bolsa, beseýi kishi qyzmetker sanatynda. Munan bólek, Mádenıet úıiniń qabyrǵasynda 12 úıirme úzdiksiz jumys isteıdi. Aıtpaqshy, 2015 jyly Qazaqstannyń eńbek sińirgen ártisi Asqar Naımantaevtyń muryndyq bolýymen Qarakemerde drama úıirmesi ashylǵan bolatyn. Arada eki jyl ótkesin túrli is-sharalarǵa arnalǵan qoıylymdarymen kókremen yqalasyna bólengen ujymǵa Almaty oblysy mádenıet basqarmasynyń qoldaýymen 3 shtattyq birlik berilip, "Qarakemer balalar teatry" bolyp quryldy. Al osy teatr ártisteri ázirlep, as kórermender nazaryna usynǵan "Aldar kóseniń sıqyrly dúrbisi" atty qoıylymdy óńirdiń balalary áli de eske alyp, sóz etedi eken.
...Aqyldy balaqaılardyń záresin alǵan alyp Dııýmen aıqasýǵa bel býǵan Aldarkóse ábjil «О́rmekshi adam» men júırik Makkýın jáne mazasyz Masha qyzben kúsh biriktirýi múmkin be? Ábden múmkin eken... Ákeler oqyǵan ertegi keıipkeri men balalar tanymyndaǵy komıks beınelerdiń basyn qosatyn sahnalyq qoıylymnan keıin kishkentaı kórermender osyndaı oı túıipti. Biz sóz etip otyrǵan sahnalyq sıýjet M.Álibektiń «Aldarkóseniń sıqyrly dúrbisi» atty ertegisiniń jelisimen qoıylǵan mınıspektaklde kórinis tapqan. Ári bul erteginiń alystaǵy aýyldyń shaǵyn teatrynda qoıylýynyń ózi bir qyzyq emes pe? Osylaısha, Qarakemer aýylyndaǵy balalar teatry kelýshilerine kóterińki kóńil kúı syılap, sahna kórkin keltirgeni anyq.
- Qarakemer aýyldyq Mádenıet úıiniń ujymy 2019 jyly Mádenıet jáne Sport mınıstrliginiń uıymdastyrýymen ótken respýblıkalyq «Rýhanı qazyna – 2019» festıvaline qatysty. Mundaı úlken deńgeıdegi baıqaýǵa qatysy joldamasy kez kelgen aýyl ónerpazdaryna buıyra bermeıdi ǵoı, ıaǵnı, bizge zor senim júkteldi. Onyń ústine kúlli eldiń túkpir-túkpirinen keletin mádenı sańlaqtardyń dodasynda oblystyń namysyn qorǵaý-úzdikterdiń ishindegi úzdikterge enshilenetin sybaǵa. Al baıqaýda aýyl, aýdan, qala berdi oblystyń úmitin aqtap, úzdik nátıjege qol jetkizý óz kezeginde bizdiń ujymǵa úlken jaýapkershilik júktedi. Úmit, senimdi aqtaý úshin mádenıet úıiniń qyzmetkerleri baryn salyp, bir jeńnen qol, bir jaǵadan bas shyǵaryp yjdaqattylyqpen jumyla kiristik. Nátıjesinde, «Rýhanı qazyna – 2019» festıvaline qatysqan Qarakemer mádenıet úıi respýblıka boıynsha «Úzdik mádenıet úıi» nomınasııasy boıynsha top jaryp shyqty, deıdi Qarkemer mádenıet úıiniń dırektory Araılym Mamyrbekova.
Almaty oblysy