Búgin Prezıdent janyndaǵy Ortalyq kommýnıkasııalar qyzmetinde Aýyl sharýashylyǵy mınıstrliginiń ókilderi Soltústik Qazaqstan oblysyndaǵy epızootııalyq jaǵdaı týraly tolyq málimet berdi, dep habarlaıdy Egemen.kz
Bir saǵatqa sozylǵan brıfıng barysynda Aýyl sharýashylyǵy vıse-mınıstri Gúlmıra Isaeva, Veterınarııalyq baqylaý jáne qadaǵalaý komıteti tóraǵasynyń mindetin atqarýshy Qyzǵaldaq Jubatqanova, Mal sharýashylyǵy ónimderin óndirý jáne qaıta óńdeý departamentiniń dırektory Erkebulan Ahmetov, Bilim jáne ǵylym mınıstrliginiń ǵylym komıteti Ulttyq bıotehnologııa ortalyǵynyń bas dırektory Erlan Ramanqulov, Densaýlyq saqtaý mınıstrligi taýarlar men kórsetiletin qyzmetterdiń sapasy men qaýipsizdigin baqylaý komıtetiniń Tóraǵasy Tımýr Sultanǵazıev BAQ ókilderiniń tolǵandyrǵan suraqtaryna jaýap berdi.
Aǵymdaǵy jyldyń 9-21 qyrkúıek aralyǵynda 5 oblysta (SQO, Aqmola, Qostanaı, Pavlodar, Qaraǵandy) ártúrli úı qustarynyń 14 315 basynyń ólimi, onyń 11 myńnan astamy Soltústik Qazaqstan oblysynda tirkeldi.
Atalǵan aımaqtarda ólgen qustardan patologııalyq materıaldar alynyp, Nur-sultan qalasyndaǵy "Veterınarııa boıynsha ulttyq referenttik ortalyqqa" joldanǵan. Búginde 4 oblysta qus tumaýy boıynsha fakt tirkeldi. Al Qaraǵandy óńirinen alynǵan synamaǵa áli zertteý júrgizilýde.
Veterınarııalyq baqylaý jáne qadaǵalaý komıteti respýblıkalyq qordan Qostanaı, Pavlodar jáne Soltústik Qazaqstan oblysynda joǵary patogendi qus tumaýyna qarsy vaksınalardyń 1,4 mln dozasyn bóldi. Vaksına óńirge jetkizilip, aýdandar men oblystarǵa tolyq taratylǵan. Karantın aıasyndaǵy barlyq is-sharalar respýblıkalyq bıýdjet esebinen júrgiziledi.
О́tken demalysta Aýyl sharýashylyǵy mınıstri Saparhan Omarovtyń tapsyrmasymen vıse-mınıstr Gýlmıra Isaeva bastaǵan arnaıy top Soltústik Qazaqstan óńirine kelip, oblysta joǵary patogendi qus tumaýynyń taralýyna jol bermeý maqsatynda jasalyp jatqan keshendi sharalardyń barysyn tekserdi.
Brıfıng barysynda vıse-mınıstr SQO-ǵa táýekelderdi baǵalaý jáne qus tumaýynyń odan ári taralýyn boldyrmaý úshin barlyq is-áreketterdiń durystyǵyna kóz jetkizý úshin arnaıy sapary boıynsha esep berdi. Sapar barysynda AShM ókilderi qyrylǵan qustyń ıelerine ótemaqy tóleý boıynsha jumysty jolǵa qoıý jáne óńirde indetke qarsy jumysty durys úılestirý jáne vaksınasııa sharalaryn uıymdastyrý, qustardyń ólekselerin joıýǵa kómektesti.
Sonymen qatar ol komıssııa óńirdegi qus fabrıkalarynyń basshylarymen kásiporyndar aınalasynda "bıologııalyq qaýipsiz ári oqshaýlanǵan" aımaqtar qurý máselesi boıynsha kelissózder júrgizgenin habarlady. Barlyq qajetti talaptar oryndalǵan jaǵdaıda óńirdiń qus fabrıkalary óz ónimderin erkin ótkizý quqyǵyn ala alady.
AShM ókilderiniń Prezıdent janyndaǵy Ortalyq kommýnıkasııalar qyzmetinde tolyq nusqasyn https://www.youtube.com/watch?v=fY3edBQ3kiA boıynsha kóre alasyzdar.