«Hatıko» sındromy
Qarashada qus ta aýyr kúrsinedi,
Qarashyqqa móldirep muń sińedi.
Qusnı-hatym aınalyp jastyǵyńa,
Sen de, janym, saǵynyp júrsiń meni.
Joldar uzaq: aramyz myń shaqyrym.
samolet ushsa baıaý...
poezdar júrse aqyryn...
Teńiz keship, taý asyp jetseńshi endi!
demeseń:
shaǵylsa Aıym, synsa Kúnim.
Sensiz júrgen joldardyń bári beker,
Bizdi jolyqtyrar ma Táńir-ákem?
Qarashamyz bıylǵy Shilde boldy,
Keri keter dúnıe, keri keter...
Kósheler de bos qaldy kóliktersiz,
Aıyryldy baıaǵy kórikten Kúz.
bul jaqta Jer – qup-qurǵaq.
bul jaqta Aýa – qapyryq.
Shalshyq sýǵa aıaǵyn malyp otyr
erikken qyz.
Kóz janaryń taldy ma Aı kúzetip?
aıǵyz betin aqtadym qaıǵy jetip.
senimenen tanysqan qaı Kúz edi?
seni menen aıyrǵan qaı Kúz edi?
Ekeýmizdi synaıtyn syqyldy Kúz,
Jalǵyzdyqqa jabyrqaý jutyldym júz.
Batys jaqqa ketip eń...
jol qaraılap,
Biz Almaty ekeýmiz kútip júrmiz...
Qashan kelesiń?
Ásel KÁRIBAI
Jazyǵy qansha?..
О́kinishterden qashqym keledi,
О́shire kórme, keýdemdegi otty – sýyq jel!
Múmkin ol sońǵy jaryǵym...
Men bolyp esip kórgende joqsyń áli kún.
Umytshy meniń aqymaqtyǵym,
álsizdigim men ókpemdi,
Aǵyzyp jasyn aqyn aqtyǵyn
Aq qaǵazdarǵa tókkendeı.
Jazyǵy qansha,
Sulýlyǵymdy jattamas seniń janaryń.
Samalmen birge syr uǵynýdy
Saǵynbaı ma álde qalaýyń!?
О́shire kórme, ótinem ony,
Eń jaryq jerim – júregim!
Aq qaǵazdardyń betinen onyń,
Sáýlesin kórip júreıin.
Qaraıta kórme,
Jylaı almaıtyn,
eshkimnen jaryq suraı almaıtyn,
Sorlymyn.
Tilekti jasqa aınaldyratyn,
Júrekti tasqa aınaldyratyn,
О́kinishterden qashqym keledi,
Dál búgin!
Nursáýle TOLQYN
Qyzǵaldaq qurbyma
Ǵajaıyp ekensiz Gollandqa bergisiz!
Siz kimsiz?!
...Aspan ba? Joq, álde Jermisiz?!
..Meniń de ǵumyrym – Qyzǵaldaq!
Tek ony...
Qaı kezde úzeri belgisiz...
Sulýlyq bolsa ǵoı máńgi jas!
Máńgi ólmes! Qazasyz!
Siz netken sulýsyz! Tazasyz!
...Ǵumyrlyq sulýlyq tek qana óleńde!
Bálkim, siz de óleń jazasyz?!
Múmkin siz uly aqyn shyǵarsyz?!
Pendelikten bıik turatyn shyǵarsyz?!
Baıqatpaı osynaý bar ǵalamdy
Meıirimdi erinińizben súıip turatyn shyǵarsyz?!
Siz kimsiz?
Jaralyp ákesiz, sheshesiz,
Nelikten kelte ómir keshesiz?!
Planeta delingen meıramxanaǵa qosh keldińiz!
Ne ishesiz?!
..Shattyq pa?! Joq, álde, muń, bálkim?
Daıashy bar ma eken?!
Tyńdar kim?!
Estilik ishińiz esepsiz,
О́mirde ózinshe jyndy árkim...
Ýa, qurbym!
Gollandtan máńgi joǵalasyz da,
Ata-jurtyńyzǵa oralasyz ba?!
Jalqynnan jalqyn kún keshtim men de,
Jan qurbym bola alasyz ba?!
Qarlyǵash QABAI