Koronavırýsqa baılanysty Úndistannyń eń ataqty nysany alty aı boıy jabyq bolǵan edi, dep habarlaıdy Egemen.kz.
Alaıda elde áli indet órship turǵandyqtan, táýligine tek 5 myń adam qabyldaıdy. Olar betperde kıip, araqashyqtyq saqtaýǵa tıis. Osyǵan deıin Táj-Mahal osynshama uzaq ýaqytqa jabylmaǵan edi.
Sońǵy ret osyndaı jaǵdaı 1978 jyly Agra qalasynda sý tasyǵan kezde bolǵan. Qazir Úndistandaǵy epıdemıologııalyq ahýal kúrdeli.
El boıynsha 5 mıllıon 400 myńnan asa adam koronavırýs juqtyrǵan. Kún saıyn 100 myńdaı jańa naýqas tirkeledi. Al dertten qaıtys bolǵandardyń sany 87 myńǵa jetti. Kúnine el aýmaǵynda bir mıllıonǵa jýyq test alynady. Alaıda 1 mıllıard 300 mıllıondaı halqy bar Úndistan úshin bul da jetkiliksiz bolyp otyr.