2000 jylǵy tamyzdyń bas kezinde Qazaqstannyń halyq aqyny Ásııa Berkenova 50 jasqa toldy. Aqynnyń ádemi kórkine, keńpeıildi, darqan minezine qaraı aspannan kún sáýlesi jerge túsip, dúnıe jarqyrap ketti. Bárimiz mereıtoıǵa baılanysty Elýbaı О́mirzaqov atyndaǵy Qostanaı oblystyq fılarmonııasynyń zalyna jınaldyq. Zalda ıne shanshar jer joq, ishi halyqqa lyq toly.
Ásııa Áıipqyzynyń atyna jyly lebizder aıtylyp jatyr. Bir kezde Qazaqstan Respýblıkasynyń Memlekettik hatshysy Ábish Kekilbaıulynyń quttyqtaýy oqyldy.
«Asa qadirli Ásııa! Siz qazaq jyrynyń shalqar aıdynyna aqqý bolyp qonyp, uǵyna biler kóńil men súısine biler kózdi birdeı qýantyp kelgensiz.
Erekshe darynyńyz ben azamattyq qarymyńyz jurtshylyqtyń ystyq yqylasy men shynaıy qurmetine ıe etti.
Dármeni bitti dep júrgen ejelgi ónerdi qaıta dáýrendetip, tarıhtyń talqyly da tartysty kezeńinde halqymyzdyń ketken qapysyn túgendep, elimizdiń jyǵylǵan eńsesin kóterýge qyzmet etkize bilgen aıtýly aıtysker aqyndar kóshbasshylarynyń birine aınaldyńyz.
Sizdiń bıik adamgershilikke, otanshyldyq pen eljandylyqqa, abzal azamattyq murattarǵa shaqyratyn shabytty shyǵarmashylyq eńbegińiz árdaıym halyq kóńilinen shyǵa bererine senim zor.
О́leńińizdeı kórkem, armanyńyzdaı asqaq ómir súrip, mereıińiz tasyp, órkenińiz óse berýine tilektestik bildiremin.
Zor qurmetpen Ábish Kekilbaıuly.
Astana. Tamyz, 2000 jyl.»
Ábish Kekilbaıulynyń kórkem, sheber tilmen jazǵan sózderi halyqty uıytyp, baýrap aldy. Júrgizýshi de mánerlep, bar daýsymen kóńildi áýenniń aqyryn súıemeldeýimen naqyshtap, kelistirip oqydy. Quttyqtaý oqylyp bolǵan soń siltideı tynyp qalǵan adamdar uzaq qol shapalaqtady. Ábish aǵanyń tereń paıymdy, jan tebirenter sózderi áser etti me, sahna tórinde turǵan Ásııa Berkenovanyń kózine jas tamshylary úıirildi. Men de osy sátte tolqyp, kóńilim bosap, ózimdi ázer tejep qaldym. Qylqalam sheberiniń qazaq tiliniń baılyǵyn kún nuryndaı taratyp, adam janyn tolqytyp, sóz qudiretin elge sezdirgeni qandaı ǵajap deseńizshi!
Esengeldi SÚIINOV,
aqyn, Qazaqstan Jazýshylar odaǵynyń múshesi