Qazaqstan halqy Assambleıasy Tóraǵasynyń orynbasary – Hatshylyq meńgerýshisi Janseıit Túımebaev Máskeý qalasynda ótken Eýrazııa halyqtary Assambleıasynyń Halyqaralyq beıbitshilik kúnine arnalǵan onlaın-aksııasyna qatysty.
Aksııa beıbitshilik pen kelisimdi saqtaý jolyndaǵy asa mańyzdy máselelerdi talqylaýǵa arnaldy.
Kirispe sózinde J.Túımebaev: «Búgingi tańda barlyq elder pandemııaǵa jáne ekonomıkalyq ósimniń baıaýlaýyna baılanysty kúrdeli kezeńderdi bastan ótkerýde. Munyń bári áleýmettik máselelerdiń shıelenisýine, al keıbir jaǵdaılarda ksenofobııanyń, etnokonfessııalyq janjal kórinisteriniń ulǵaıýyna yqpal etetini barshamyzǵa málim.
Mádenıetter men qundylyqtardyń alshaqtaýynyń kórinisi, mıgrantofobııa men násilshildiktiń ósýi, ózara beıimdelý prosesiniń qıyndyqtary buryn sátti júrgizilgen etnomodelderdiń HHI ǵasyrda keıde jumys istemeı otyrǵanyn kórsetti. Kerisinshe, álem burynǵydaı, qazirgi ahýal talaptaryna saı keletin, birliktiń jańasha formýlalaryn jasaý prosesinde bolyp otyr. Sondyqtan birlikti qamtamasyz etý mindeti kóp quramdy barlyq memleketterdiń negizgi kún tártibinde qala beredi», – dedi.
QHA Tóraǵasynyń orynbasary óz sózinde Qazaqstan yntymaqtastyqqa uıytqy bolǵan memleket ekendigin atap ótti: «Álemniń 60-tan astam eli men aýmaǵy bizdiń etnostarymyzdyń tarıhı otany bolyp tabylady. Zań aldyndaǵy teńdik, qoǵamdyq kelisim, «Áralýandyqtaǵy birlik» qaǵıdattary bizdiń baǵa jetpes baılyǵymyz jáne strategııalyq resýrsymyzǵa ulasty.
1995 jyly Tuńǵysh Prezıdent N.Á.Nazarbaevtyń bastamasymen qurylǵan Qazaqstan halqy Assambleıasy etnosaralyq ózara is-qımyldyń negizgi ınstıtýtyna aınaldy. 25 jyl buryn ol 40-qa jýyq etnomádenı birlestikterdi biriktirse, búgingi tańda mundaı qurylymdar sany myńnan asady. Búkil el aýmaǵynda tatýlyq pen kelisimniń azamattyq ortalyqtaryna aınalǵan qyryqtan astam Dostyq úıi bar.
Bizdiń ıntegrasııalyq model, eń aldymen, ortaq qundylyqtar, etnostardyń tilderi, mádenıeti, dástúrleri bizdiń jalpy mádenı baılyǵymyzdy quraıtyn eldiń jalpy mádenı keńistigi negizinde qurylady.
Álemdi birge qalyptastyra otyryp, biz áriptesterdi polıetnosty qoǵamdarda tatýlyq pen birlikti nyǵaıtýdyń tıimdi formýlasyn izdeý úshin kúsh-jigerdi biriktirýge shaqyramyz», dedi Janseıit Túımebaev.
Konferensııa jumysyna sondaı-aq kórnekti qoǵam jáne ǵylym qaıratkerleri, IýNESKO, BUU halyqaralyq uıymdarynyń jáne Reseıdegi dıplomatııalyq mıssııalardyń ókilderi qatysty.