Qusy qıqýlap, balyǵy týlaǵan Sarykóldiń jaǵasynda «Tirshilik» sharýa qojalyǵy qonys tepken. Qurylǵanyna jıyrma jyl tolǵan qojalyqtyń basty baǵyty – sút.
Taýarly sút fermasyn qolǵa alǵan sharýashylyq jetekshisi Baqytjan Máselov osydan eki jyl buryn Reseıdiń Barnaýlynan elý shaqty sútti sıyr alyp kelgen-tuǵyn. Aýdan basshylyǵynyń kózdegeni de saýyn sıyrdyń basyn kóbeıtip, sút ónimderin ózderinde shyǵarý edi. Áıtpese et baǵytynda mal ósirip otyrǵan sharýalar jeterlik.
– Qojalyqty alǵash ákemiz ashqan. Úıdiń kenjesi bolǵandyqtan, keıin ózim aralasyp kettim. 2018 jyldyń kúzinde Reseıden býaz qunajyndar satyp alyp, aýylǵa jetkizdim. Sodan beri eki ret tóldedi. Paıdasyn kórip otyrmyz. Byltyr saýynǵa arnalǵan avtomatty apparat ta satyp aldyq, – deıdi qojalyq ıesi Baqytjan Máselov.
Apparat 60 basqa arnalǵanymen, qazirgi kúnde 15 sıyr ǵana saýyp otyr. Alyp kelgen sıyrdyń bárin qaz-qatar tizip qoıyp saýyp alýǵa ábden bolar edi. Alaıda sút ótkizetin oryn joq. Shaǵyn ǵana sharýasyn dóńgeletip otyrǵan qojalyq úshin sútti О́skemenge aparyp ótkizý tıimsiz. Sol úshin de Baqytjannyń jubaıy Araı saýyp alǵan sútti tartyp, kilegeıi men maıyn aýdan ortalyǵyna jóneltedi.
Al qalǵan 150 bas iri qara Qaraǵash jaılaýynda. Onyń ishindegi sımmental asyl tuqymdysynyń sany osy kúnde seksenge jetken. Tabyndaǵy buqalar da asyl tuqymdy. Bulardy jaz jaılaýǵa aıdaıtyn taǵy bir sebebi – aýyl mańynda jaıylymdyq jer az. Sarykóldiń mańaıy egistik alqaptary. Qojalyqqa tıesili 70 gektar jerdiń otyzy ǵana shabyndyq. Onyń ózi alystaý Kúrshim aýyly jaqta. Al mańaıdaǵy jerler aýyldyq turǵyndarǵa tıesili.
– Jer keń bolsa, aýyl úshin ǵana emes, aýdanǵa mol paıda ákeler me edik?! Turǵyndardy da jumyspen qamtýǵa bolar edi. Ázirshe tórt adamǵa turaqty jumys berip otyrmyz, – deıdi qojalyq ıesi.
Olardyń ekeýi baqtashy. Baqtashylar osy aıdyń sońyna qaraı Sarykólge túsedi. Qystaqta qystaıǵy jemshópteri ázirlenip jatyr. Bolashaqta júz shaqty sıyrdy saýyp, sútin kádege jaratyp otyrý qojalyq jetekshisiniń armany.
Shyǵys Qazaqstan oblysy,
Kúrshim aýdany