Ajalǵa arasha tústi

Qyrkúıek aıynyń basynda elorda aýmaǵyndaǵy aýyldyń birinde qaıǵyly oqıǵa boldy. Abaısyzda eki balany traktor basyp, bir jetkinshek oqıǵa ornynda kóz jumdy. Al ekinshi bala elordalyq balalar aýrý­ha­nasyna jedel jetkizildi. Aýyr halde túsken naýqastyń jaǵdaıyn hırýrgter, neırohırýrg, travmatolog jáne rea­nımatologter qarap, dereý apparatqa qosyp, operasııaǵa aldy. Bala 10 kún jansaqtaý bóliminde jatty.

Aýrýhananyń travmatolog dárigeri Muhtar Ahmurzaevtyń aıtýynsha, qyz bala klınıkaǵa jaraqattyq shok jaǵdaıynda túsipti. Jambas músheleriniń jara­qattaryna shuǵyl jasal­ǵan operasııadan soń jansaqtaý bóliminde kúni-túni aq jeleńdi jandardyń qadaǵalaýynda bolǵan onyń jaǵdaıy jaqsar­dy. Bylaısha aıtqanda, maman­dardyń kelisilgen is-áreket­te­riniń ar­qa­­synda bala aman qaldy.

«Bala óte aýyr jaǵdaıda, 3-dárejeli jaraqattyq shok jaǵdaıynda tústi. Ma­man­dar­dyń ýaqtyly jedel kómek kórsetkeni asa mańyzdy boldy. Bala apparatqa qosylyp, shokqa qarsy terapııa júr­gi­zil­di. Shuǵyl túrde ota jasaý kerek ekeni belgili boldy», dedi dáriger. Bes jasar qyzdyń basynan ótken oqıǵa ol otbasy úshin qatty soqqy bolǵany ras. Biraq áıteýir bilikti mamandar qımylynyń arqasynda balasy ólimnen qalǵan. Kún saıyn ilgerilep, jaǵdaıy jaq­saryp kele jatqan bala­panyn qushqan ananyń qýanyshy nemen ólshenbek? Dárigerlerge sheksiz alǵysyn qalaı jet­ki­zerin bilmegen anasy qazir qy­zynyń qasynda, kórer ja­ryǵyn taýyspaǵan Alla taǵa­la­ǵa razylyǵyn bildiredi.

«Qazir qyzymnyń jaǵ­da­­ıy da, kóńil kúıi de jaq­sy. Ákesimen beınebaılanys arqyly telefonmen sóı­le­sip turady. Barlyq otba­­s­y, týystardyń atynan dári­ger­ler­ge myń alǵys aıta­myz. Birinshi, Qudaı­dyń qala­ýy­men, ekinshi, dári­ger­ler­diń arqa­syn­da qyzymyz qazir aman-esen qa­symyzda», deı­di qyz­dyń anasy.

«Biz dárigerler úshin de qyzdyń aman-esen shyǵýy úlken qýanysh. Jambas pen zár shyǵarý joldary qatty zaqymdanǵan. Qazir balanyń jaǵdaıy turaqty. Barlyq prosedýralardy aıaqtaǵannan keıin úıine shyǵarylady», deıdi Hırýrgııalyq bólimniń basshysy Rınat Baıgıreev.