Túrkistan oblysynyń erikti jastary "Otyrar tóbe" qalashyǵynda restavrasııa jumystaryn ótkizip, kóne qalanyń tarıhymen tildesip qaıtty. Otyrar aýdanynda ornalasqan "Otyrar tóbeniń" restavrasııa jumystary jarty jyldan beri júrip jatyr, ótken aptada túrkistandyq 30 volonter sondaǵy mamandarǵa kirpish tasý men tazalyq jumystaryna kómektesti, dep habarlaıdy Egemen.kz.
"Jas Ulan" biryńǵaı balalar men jasóspirimder uıymy jáne "Birgemiz: Asyl Mura" jalpyulttyq jobasy aıasynda ótip jatqan jobanyń negizi maqsaty - mádenı-tarıhı murany saqtaý jáne damytý, tarıh, mádenıet eskertkishteri men memorıaldyq keshenderdi qalpyna keltirý.
"Otyrar tóbe" bizdiń halqymyzdyń tarıhyn qoınaýyna saqtap jatqan qasıetti oryn, ári onyń halqymyzdyń tarıhynda alatyn orny erekshe. Túrkistan óńiriniń eriktileriniń "Otyrar tóbege" barýy jastardyń el tarıhyna, jer tarıhyna qyzyǵatynyn kórsetedi. Erikti jastar jerde tarıhtyń qoınaýyna súńgip, rýhanı baıyp keldi desek te bolady. Sondaı-aq, mundaı sharalar jastardy eńbekke baýlýǵa, tulǵalyq qalyptasýǵa kóp kómegin tıgizedi", - deıdi Túrkistan oblysy qoǵamdyq damý basqarmasy "Jastar resýstyq ortalyǵy" basshysy Amalbek Dárkenuly.
"Otyrar tóbe" qalashyǵyna barǵan volonterler tek kómek kórsetip ǵana qoımaı, tarıhqa degen qyzyǵýshylyqtary artyp, bolashaqta osy oryndardy týrıstik aımaqtar retinde tanytýdy maqsat tutady.
"Otyrar qaqpasyna jeter kezde aldymyzdan shyqqan aǵanyń "tarıhty kózben kórińder" degen sózi bul mekenge degen qyzyǵýshylyǵymyzdy arttyra tústi. Ońtústikte tursam da, Otyrarǵa alǵash barýym. Tarıhtan oqyǵan áńgimeler, sol zamanǵy oqıǵalar esime túsip, qalashyqty aınala kórip shyqtym. Qanshama ǵasyr saqtalǵan kóne qumyralar, bólmeler men oshaqtar orny meni sol zamanǵa alyp bardy", - deıdi jas volonter Madına.
Qazir Túrkistan oblysynda "Birgemiz: Asyl Mura" baǵyty boıynsha 200-ge jýyq volonter bar. Ol jastar elimizdiń tarıhı-mádenı murasyn saqtaýǵa jáne keleshek urpaq arasynda volonterlikke qyzyǵýshylyqty arttyrýǵa óz úlesterin tıgizip jatyr.