Álııa men Ásııa Mańǵystaý aýdany Shaıyr aýylynda turady. Sýret áleminiń qyr syryn meńgergen egiz qyzdar kez kelgen sýretke «til» bitirip, minez beredi. Olardyń kóptegen týyndylary oblys kóleminde júldeli oryndardy ıelengen. Búginde ekeýi Oral qalasyndaǵy joǵary oqý ornynyń birinshi kýrs stýdenti.
– Kishkentaılarynan teledıdarda kórsetiletin túrli mýltfılm keıipkerlerin úıdiń qabyrǵasyna salatyn. Sodan úıdiń qabyrǵalary keıipkerlerge tola bastady. Basynda qyzdaryma renjidim. Keıinnen olardyń boıyndaǵy talanttaryn baıqadym. О́ıtkeni, salynǵan sýretter týra mýltfılmdegiden aınymaıtyn. Keıin qyzdarymnyń bul qabiletterin mektep muǵalimderi baıqap, talaptaryn ári qaraı shyńdaýǵa kúsh jumsady. Ásirese mekteptiń kórkem eńbek pániniń muǵalimi Shynar Jeńisqyzy kóp kómek kórsetti, deıdi qyzdardyń anasy Júzbaeva Qamajaı.
Al ustaz Shynar Jeńisqyzynyń aıtýynsha, Álııa men Ásııa túrli janrda sýret salady. Anımasııalyq, portret, shynyǵa sýret salý, kóshirme sýret, tarıhı, turmystyq baǵyttaǵy sýretterdi qaǵaz betine túsiredi.
– Álııaǵa birde oblystyq jarysta jerebe sýyrǵanda ózine tanys emes komıks janry tústi. Qazaqtyń batyrlarlarynyń beınesin ańyz boıynsha bederleý kerek. Berilgen ýaqyt ishinde «Kerqula atty Kendebaı» ertegisin bir qaǵazdyń betine on bes sýretpen beınelep shyǵyp, ekinshi oryndy ıelendi. Osylaısha ózine tanys taqyryp bolmasa da esh qaımyqpastan jarysqa qatysqan 15 oqýshynyń ishinen sýyrylyp alǵa shyqty, – deıdi ol.
Oqýshynyń qabiletin tanyp, tárbıeleı bilgen aýyl ustazy qos sýretshi shákirtin alysqa ushyrdy. Olardyń bolashaǵyna úlken úmitpen qaraǵan onyń endi aýyldaǵy ózge de talantty balalardyń qanatyn qataıtyp, tomaǵasyn sypyrýǵa sebi tıedi dep oılaımyz.
Mańǵystaý oblysy