Inder aýdanynda turatyn tórt jasar Sanjar Sársenbaıdyń armany – polıseı bolý. Qazir «Aınalaıyn» balabaqshasyna baryp júr. Osyndaǵy «Men óskende kim bolamyn?» jobasyna qatysady. Jaqynda aýdandyq polısııa bólimine arnaıy kıimmen kelip, bolashaq mamandyǵynyń qyr-syryna qanyqty.
– Men óskende polısııa qyzmetkeri bolamyn. О́ıtkeni polıseıler tártibi nashar adamdardy ustap alyp, bizdiń tynyshtyǵymyzdy kúzetedi. Bárine kómektesedi. Sondyqtan polısııa bóliminde jumys isteıtin aǵalarmen tanysqym, olardy kórgim keldi, – deıdi kishkentaı «polıseı» Sanjar.
Onyń otbasynda 3 ul, 1 qyz bar. Ákesiniń jeke kásibi bar. Al anasy – dáriger. Polısııa bólimine ertip kelgen aǵasynyń aıtýynsha, Sanjar – ýádesinde turatyn qaısar bala. Tártip saqshysy bolýǵa qulshynysy da zor.
Polısııa bóliminiń qyzmetkerleri Sanjardy qýana qarsy aldy. Olar polısııa qyzmetkerleriniń jumysy, bul mamandyqtyń qıyndyǵy men qaýipti sátteri týraly áńgimelep berdi. Kóshedegi jol belgilerimen, qoǵamdyq tártipti saqtaý maqsatynda júktelgen mindettermen tanystyrdy.
Atyraý oblysy