Senator Olga Perepechına Premer-Mınıstrdiń atyna joldaǵan depýtattyq saýalynda sýbvensııalar men joǵary turǵan bıýdjetterden beriletin nysanaly transfertter aýyl ákimdikteriniń shyǵystaryn qarjylandyrýdyń negizgi kózi bolyp qalatynyn atap ótti, dep habarlaıdy Egemen.kz.
Depýtat Qazaqstandaǵy aýyl turǵyndary ózderiniń mańyzdy máselelerin 4-shi deńgeıdegi bıýdjet qarjysy esebinen sheshýge múmkindigi bar ekenin atap ótti. Bul sýmen jabdyqtaýǵa, joldardy jóndeýge jáne kútip ustaýǵa, sondaı-aq basqa da máselelerge qatysty. Degenmen, is júzinde bul salalar aýdandyq bıýdjetten qarjylandyrylady, keıde múlde qarjylandyrylmaıdy jáne jergilikti jurtshylyq bul sheshimderdiń qabyldanýyna yqpaly joq. Bıýdjettegi tepe-teńsizdiktiń negizgi sebebi halyq sany 2 myńnan kem aýyldyq bıýdjetterdiń shyǵystaryn óz kiristerimen qamtamasyz etýdiń tómendiginde bolyp otyr. Al bizdiń elimizde olardyń sany 1301 nemese jumys istep turǵan barlyq okrýgterdiń 56%-y bolyp tabylady.
«2023 jylǵa deıin salyqtyń keıbir túrlerin tóleýden bosatý aýyldyq okrýgter kiristeriniń tómendeýine áser etedi, munyń bári jalpy bıýdjetke qatysty menshikti kirister úlesiniń azaıýyna yqpal etedi. Odan basqa, aýyldyq okrýgterdiń salyq salý bazasynyń ulǵaıýyn tejeýshi faktor jyljymaıtyn múlikti, jerdi jáne avtokólikti esepke alýdyń aqparattyq júıeleriniń jetilmegendigi bolyp tabylady - bul eskirgen jáne senimsiz derekter bazasy», - dep málimdedi depýtat Olga Perepechına.
Memleket basshysy 2020 jylǵy 1 qyrkúıektegi Joldaýynda «Memlekettik organdarǵa bıýdjettik derbestik bergen jón. Bul mindetterdi shuǵyl sheshýge jáne ujymdyq jaýapsyzdyq pen áýre-sarsańnan qutylýǵa múmkindik beredi» degen bolatyn.
Senator sondaı-aq búginde ulttyq ekonomıka jáne qarjy mınıstrlikteri jergilikti atqarýshy organdardyń respýblıkalyq bıýdjetten beriletin bıýdjettik sýbvensııalardy jáne respýblıkalyq bıýdjetten sýbvensııalar esebinen qarjylandyrylatyn shyǵystardy paıdalanýyna baqylaýdy engizý máselelerin pysyqtap jatqanyn habarlady.
«Bıýdjet kodeksiniń erejeleri Úkimettiń jáne ózge de ortalyq memlekettik organdardyń oblystardyń derbes bıýdjet prosesine aralasýyna jol bermeıdi. Memlekettik organdar usynǵan ereje qabyldanǵan jaǵdaıda jergilikti ózin-ózi basqarý bıýdjetiniń derbestik qaǵıdaty buzylady, jedeldik azaıady jáne bıýdjettiń barlyq deńgeılerinde – oblystyq, aýdandyq, qalalyq jáne aýyldyq deńgeıde qujat aınalymynyń kólemi is júzinde on ese artady», - dedi Olga Perepechına.
Sonymen qatar, senatordyń aıtýynsha, Qazynashylyq-Klıent aqparattyq júıesi qujattardyń aýqymdy kólemine baılanysty shtattyq rejımde jumys isteýge daıyn bolmady jáne 8 aıdyń qorytyndysy boıynsha qarjynyń 50%-dan astamyn jergilikti bıýdjetter ıgere almady.
Depýtat óziniń sózin qorytyndylaı kelip, bir qyzmetker birneshe fýnksııany qatar oryndaıtyn aýyldyq okrýgterdegi apparattardy 25%-ǵa ońtaılandyrý olardyń jumys sapasyna teris áser etetinin atap ótti.