Qazaqstannyń Syrtqy ister mınıstri Muhtar Tileýberdiniń tóraǵalyǵymen onlaın rejimde Teńizge shyǵar joly joq damýshy elder tobynyń (TShJDE) jyl saıynǵy mınıstrlik otyrysy ótti.
Kezdesýge qatysýshylarǵa BUU Bas hatshysy Antonıý Gýterrısh, BUU Bas Assambleıasynyń 75-shi sessııasynyń Tóraǵasy Volkan Bozkır, BUU-nyń Eń osal damýshy elder úshin Joǵary ókili Fekıtamoeloa Ýtoıkamaný sóz sóıledi.
Otyrysty ashqan mınıstr pandemııadan neǵurlym zardap shekken osal elderdiń osy toby halyqaralyq áriptester men donorlar tarapynan barabar qoldaýdy talap etetinin atap ótti. Qazaqstan 2020-2021 jyldarǵa arnalǵan TShJDE tobynyń jahandyq tóraǵasy bola otyryp, top elderiniń múddelerin barlyq tıisti alańdarda qorǵaýdy jáne ilgeriletýdi jalǵastyrady.
Kezdesý qorytyndysy boıynsha top elderiniń problemalaryn, onyń ishinde álemdik naryqtardan alystyǵymen jáne tranzıttik elderge táýeldiligimen baılanysty problemalardy sheshýdegi progresti jedeldetý jónindegi Jol kartasy qabyldandy. Qazaqstan tóraǵalyǵynyń bastamasymen jasalǵan qujat 2024 jylǵa deıingi kezeńde osy mindetterdi jedel iske asyrý úshin barlyq múddeli taraptardyń kúsh-jigerin biriktirýge yqpal etetin bolady.
Is-sharaǵa 200-den astam delegat, onyń ishinde TShJDE qataryna kiretin 32 eldiń jáne seriktes elderdiń syrtqy saıası vedomstvolarynyń basshylary, halyqaralyq uıymdar men BUU agenttikteriniń basshylary, sonyń ishinde ESKATO, EEK, BUU О́DU, HEBO, DKU, IýNEP jáne t.b. qatysty.