Aqtaýdyń 57 jyldyǵyna oraı, elimizdiń ken baılyǵyn ıgerýge at salysyp júrgen geologtar qaýymynyń qurmetine tuńǵysh ret alleıa ashyldy, dep habarlaıdy Egemen.kz.
Ashylý saltanatyna oblys ákiminiń orynbasary Ǵalymjan Nııazov, qala ákimi Nurdáýlet Qılybaı, ardager geolog-barlaýshylar, Qazaqstan munaıshy-geologtar qoǵamynyń prezıdenti Baltabek Muqanuly Qýandyqov jáne arnaıy Temirtaý qalasynan kelgen Aqtaý kentiniń ákimi Altynbek Esmurzaev bastaǵan delegasııa qatysty.
Aqtaý kentinen kelgen delegasııa qalanyń 57 jyldyq mereıtoıymen quttyqtap, shahar turǵyndaryn merekemen quttyqtady.
"Nurdáýlet Igilikulynyń shaqyrýymen arnaıy keldik. Búgin erekshe kún. Eki Aqtaýdyń ákimderi kezdesti. Aldaǵy ýaqytta tyǵyz áriptestik qarym-qatynasta bolmaqpyz. Búgin eki óńirdiń arasynda saýda jáne ekonomıkalyq qatynastardy ornatý, bilim, mádenıet, densaýlyq salasynda ortaq jobalardy iske asyrý maqsatynda yntymaqtastyq týraly memorandýmǵa qol qoıamyz. Aqtaý qalasynyń mereıtoıymen quttyqtaımyn! Birligimiz arta bersin", dedi Altynbek Esmurzaev.
Arhıtektýralyq nysanda burǵylaý, munaı alý qondyrǵysy, geologtardyń atrıbýty: balǵa men tabylǵan tas kompozısııasy beınelendi. Mańǵystaýda ashylǵan ken-oryndarynyń tizimi men ataqty geolog-barlaýshylardyń esimderi jazyldy. Alleıanyń avtory ardager Beısenbaı Bısenǵalıev, al qurylysyn salýǵa Qazaqstan munaıshy-geologtar qoǵamy men óńirlik fılıalynyń qyzmetkerleri muryndyq boldy.