Búgin Abaı Qunanbaıulynyń 175 jyldyǵyna arnalǵan A.Jubanov pen L.Hamıdıdiń "Abaı" operasynyń tusaýkeseri onlaın túrde ótti, dep habarlaıdy Egemen.kz oblys ákiminiń baspasóz qyzmetine silteme jasap.
"Abaı" operasy Syr elinde tuńǵysh ret sahnalanyp otyr. Operanyń qoıýshy rejısseri Shymkent qalalyq opera jáne balet teatrynyń rejısseri ári solısi, "Mádenıet qaıratkeri" tósbelgisiniń ıegeri Qaırat Qulynshaqov.
Basty roldi oblystyq fılarmonııa ánshisi Aıdos Imanjapparov somdady.
Qoıylymda oblystyq fılarmonııanyń, N.Bekejanov atyndaǵy qazaq akademııalyq mýzykalyq drama teatrynyń ártisteri, kameralyq orkestr, «Tomırıs» bı ansambli, Qazanǵap atyndaǵy Qyzylorda mýzykalyq joǵary kolledjiniń «Án salý» bóliminiń stýdentteri men aralas hor ujymynan quralǵan 100-den asa ónerpaz óner kórsetti.
Qoıylym oblystyq fılarmonııasynyń kameralyq orkestriniń súıemeldeýimen ótti. Dırıjeri «Mádenıet qaıratkeri» tósbelgisiniń, «Qurmet» ordeniniń ıegeri Keýlimjaı Botabaev.
Elde engizilgen karantın talaptaryna oraı turǵyndar «Abaı» operasynyń kórsetilimin «Qyzylorda» telearnasy men Youtube áleýmettik jelisindegi «Syr shańyraǵy» kanaly arqyly tamashalaı alady.