Senat Tóraǵasy, Álemdik jáne dástúrli dinder lıderleri Sezi Hatshylyǵynyń basshysy Máýlen Áshimbaev Vatıkannyń Qazaqstandaǵy Apostol nýnsıi Frensıs Assızı Chýllıkatpen kezdesti, dep habarlaıdy Egemen.kz Parlament Senatynyń baspasóz qyzmetine silteme jasap.
Kezdesý barysynda elimizde dinaralyq dıalogty damytý jáne qoǵamdyq kelisimdi nyǵaıtý máseleleri talqylandy.
Máýlen Áshimbaev bıyl Qazaqstan men Vatıkan arasyndaǵy dıplomatııalyq qarym-qatynasqa 28 jyl tolǵanyn atap ótti. Sondaı-aq, Senat Tóraǵasy osy ýaqyt aralyǵynda eki memleket túsinistik pen yntymaqtastyqqa negizdelgen syndarly ózara is-qımyl qalyptastyrǵanyna nazar aýdardy.
Sonymen qatar Álemdik jáne dástúrli dinder lıderleri Sezi Hatshylyǵynyń basshysy bizdiń qoǵamda toleranttylyqty jáne túrli din men etnos ókilderine qurmetpen qaraýdy dáriptep júrgen Qazaqstandaǵy katolık shirkeýiniń jumysyna toqtaldy.
Odan bólek, Máýlen Áshimbaev pen Frensıs Assızı Chýllıkat Álemdik jáne dástúrli dinder lıderleri Sezi Hatshylyǵynyń jumysy aıasynda syndarly ózara is-qımyldy ári qaraı jalǵastyrýǵa nıetti ekenderin jetkizdi.