Qazaqstan Prezıdenti birqatar memlekettiń elshilerinen senim gramotalaryn qabyldady, dep habarlaıdy Egemen.kz Aqordanyń baspasóz qyzmetine silteme jasap.
«Aqorda» rezıdensııasynda birqatar shet memlekettiń jańadan taǵaıyndalǵan Tótenshe jáne ókiletti elshileriniń Qazaqstan Prezıdentine senim gramotalaryn tapsyrý rásimi ótti.
Memleket basshysyna Belarýs Respýblıkasynyń Elshisi Pavel Ýtıýpın, Fınlıandııa Respýblıkasynyń Elshisi Soılı Makelaınen-Býhanıst, Avstrııa Respýblıkasynyń Elshisi Vıllı Kempel, Majarstan Elshisi Mıhaı Matıash Galoshfaı senim gramotalaryn tapsyrdy.
Qasym-Jomart Toqaev sheteldiń dıplomatııalyq mıssııasy basshylarymen áńgimelesý barysynda atalǵan tórt memlekettiń barlyǵymen Qazaqstannyń qarym-qatynasy jaqsy jáne túrli salalardaǵy yqpaldastyq deńgeıi joǵary ekenin atap ótti. Osyǵan baılanysty Prezıdent memleketter arasyndaǵy tıimdi yntymaqtastyqtyń odan ári damı beretinine senim bildirdi.
– Sizder Eýropanyń tórt memleketiniń ókilisizder. Elimizdiń Syrtqy saıası tujyrymdamasynda Eýropamen aradaǵy qarym-qatynastarǵa erekshe mán berildi. Eýropa Qazaqstanda saıası, ekonomıkalyq yntymaqtastyq jáne ınvestısııa tartý isi boıynsha mańyzdy ról atqarady. Yntymaqtastyǵymyz odan ári jalǵasa beredi dep oılaımyn. Qazaqstan men sizderdiń elderińiz arasyndaǵy yqpaldastyqqa qosymsha serpin berýimiz qajet, – dedi Memleket basshysy.
Prezıdent koronavırýs pandemııasyna baılanysty memlekettiń meılinshe kúrdeli kezeńdi bastan ótkerip otyrǵanyn aıtty.
– Biz qazirgi jaǵdaıda ekijaqty qatynastarǵa da, jahandyq ólshemge de áser etetin jańa kún tártibin qarastyrýymyz kerek. Biz COVID-19 pandemııasynyń qıyndyqtary men saldaryn eńserý úshin osy salada ózara tyǵyz yqpaldastyq ornatamyz dep úmittenemin, – dedi Qasym-Jomart Toqaev.
Memleket basshysy óziniń Qazaqstan halqyna arnaǵan jylsaıynǵy Joldaýynda elimizdi jańǵyrtý, qoǵamdyq ómirdi demokratııalandyrý máselelerin qozǵaǵanyn atap ótip, dıplomattardy atalǵan saladaǵy baılanystardy nyǵaıtýǵa tıisti deńgeıde mán berýge shaqyrdy.
– О́zara túsinistikti nyǵaıtý úshin elimizdiń Úkimetine de, ózderińizdiń úkimetterińizge de kómektesesizder dep úmittenemin. Qazirgi ýaqytta bul asa mańyzdy. Kóptegen memleketterdiń arasynda osyndaı ózara túsinistiktiń joqtyǵy halyqaralyq qatynastardyń shıelenisýine alyp keledi. Máseleniń máni osynda, – dedi Memleket basshysy.
Qasym-Jomart Toqaev elshilerdi Qazaqstandaǵy dıplomatııalyq mıssııalarynyń resmı túrde bastalýymen quttyqtap, olardyń ekijaqty qatynastardy ári qaraı nyǵaıtý isine tabys tiledi. Sonymen qatar óziniń áriptesterine – Belarýs, Fınlıandııa, Avstrııa jáne Majarstan memleketteriniń basshylary men úkimetteriniń jetekshilerine júrekjardy sálemin joldady.