Tobyl óńirinde qashyqtan oqytyp jatqan muǵalimder de, úıde otyryp bilim alatyn oqýshylar da qajetti tehnıkalyq qurylǵylarmen tolyq qamtamasyz etilgen. Sabaqtar oqý jospary boıynsha bekitilgen kestege sáıkes júrip jatyr. Al shtattyq rejimde jumys istep jatqan 336 bilim mekemesinde 22 myńnan astam bala mektepke baryp oqyp júr. Bastaýysh synyptarda 15 oqýshyǵa shaqtalǵan kezekshi synyptar jumys istep jatyr. Búginde aımaq mektepterinde 2016 kezekshi synyp bar.
Bilim basqarmasynyń basshysy Záýre Báımenovanyń aıtýynsha, eń birinshi kezekte shtattyq rejimde jumys istep jatqan mektepterdegi sanıtarlyq talaptardyń saqtalýy qatań qadaǵalanady. Bul maqsatta oblystyq bıýdjet qarajatynan bilim berý uıymdaryna jeke qorǵanys quraldary men dezınfeksııalaý quraldaryn satyp alý úshin 30,5 mln teńge bólingen.
– Balalardyń ómiri men densaýlyǵyn saqtaý maqsatynda mektepterge barlyq sanıtarlyq qaýipsizdik sharalary júrgizildi. Mektepke kirip-shyǵý talaptary bekitilip, onyń oryndalý barysy kúndelikti qadaǵalaýǵa alyndy. Kún saıyn ár mekteptiń kireberisinde medısına qyzmetkerleri kezekshilik etedi. Olar qyzmetkerler men oqýshylardy termometrmen tekserip, qoldaryn, aıaq kıimderiniń tabanyn dezınfeksııalap tańerteńgi fıltrden ótkizip baryp qana mektepke kirgizedi. Bıyl 25 qyrkúıekte oblystyq máslıhattyń sessııasynda qosymsha dezınfeksııalaý quraldaryn, ıaǵnı sanıtaızerler, aıaqkıimge arnalǵan dezınfeksııalaý kilemsheleri, termometrler, aýa resırkýlıatorlary, kvars shamdary, antıseptıkter men deohlor satyp alý úshin taǵy 206,5 mln teńge qarajat bólinip otyr, – dedi Z.Báımenova.
Qashyqtan oqytýdyń basty quraly – sapaly ınternet pen qýatty kompıýter. Bıylǵy jaz maýsymynda jergilikti bıýdjettiń 1,4 mlrd teńge qarjysyna 6 myń kompıýter satyp alynǵan. Qyrkúıekte Úkimet qorynan 2,4 mlrd teńge taǵy bólinip, 1 584 kompıýter, 11 586 noýtbýk, 2 052 planshet satyp alynyp otyr. Bul kompıýter qurylǵylarynyń alǵashqy legi taıaýda ǵana oblystyń 8 aýdanyndaǵy mektepterge taratyldy. Basqarma basshysynyń sózinshe, qashyqtan oqýdy qamtamasyz etý maqsatynda jyl basynan beri oblys mektepterine 12458 kompıýter jetkizilgen. Qazan aıynda Qostanaıǵa jalpy sany 13 638 noýtbýk pen planshet kelýi tıis. Olar 20 aýdandaǵy qalǵan mektepterge taratylyp beriledi.
Bıyl balabaqshalarmen jáne orta bilim beretin mekemelerdi beınebaqylaý kameralarymen qamtamasyz etý maqsatynda 187,2 mln teńge bólinip, qyrkúıek aıynyń birine deıin oblystaǵy 488 mektep pen 122 balabaqshanyń barlyǵyna birdeı beınebaqylaý qurylǵylary ornatyldy.
Endigi másele jyly dárethanasy joq mektepterdiń máselesin sheshý bolyp tur. Máselen, Amangeldi aýdanynda 11 mektepte, Jangeldın aýdanynyń 3 mektebinde jyly dárethana joq. Osy 14 mektepti ishki sanıtarlyq toraptarmen jabdyqtaý úshin oblystyq bıýdjetten 23,9 mln teńge bólingen. Basqarma basshysy jyl sońyna deıin bul másele sheshiletinin aıtty.
Búginde oblystaǵy jalpy bilim beretin 321 mekteptiń avtonomdy jylytý júıesi bar. 2 mektep elektrmen jylytylady. Al 33 mektep pesh jaǵyp otyrsa, 132 bilim oshaǵy ortalyq jylý júıesine qosylǵan.
– Búgingi tańda peshpen jylytylatyn 33 mekteptiń bári bir qysqa jetetin otyn, kómirlerin túsirip aldy. Qazirdiń ózinde 468 mektepte jylý júıesi jumys istep tur. Gazben jylytylatyn 16 mekteptiń eseptegish quraldary tekserilip jatyr. Tekserý jumystary aıaqtalysymen, olar da jylý júıesine qosylady. Sondaı-aq qazir josparly kúrdeli jóndeý jumystary júrip jatqandyqtan, Qostanaı qalasyndaǵy 4 mektep jylýsyz otyr. Jóndeý aıaqtalysymen bul mektepterge de jylý beriledi, – dedi Z.Báımenova.
Basqarma basshysy oblysta arnaıy bilim beretin uıymdardyń da qyzmet aıasy keńeıtilip jatqanyn tilge tıek etti. Máselen, qyrkúıekte Rýdnyı qalasynda Qostanaı qalasyndaǵy psıhologııalyq-pedagogıkalyq túzeý ortalyǵynyń qurylymdyq bólimshesi ashylǵan. Bul erekshe bilim berýdi qajet etetin balalardyń oblys ortalyǵyna barmaı-aq jergilikti jerde sapaly korreksııalyq kómek alýyna múmkindik berip otyr. Aldaǵy qarasha aıynda Arqalyq qalasy men Amangeldi aýdanynda da osyndaı ortalyqtardy ashý kózdelip otyr.
Oblys mektepterinde kúndelikti ótetin pán sabaqtarymen qatar, oqýshylardyń tanymyn keńeıtip, qabiletin ushtaıtyn onlaın rejimdegi bilim baıqaýlaryn uıymdastyrýǵa esh kedergi joq. Mysaly, 28 qyrkúıekte óńirlik WorldSkills Kostanay-2020 chempıonaty bastaldy. Tórt kúnge sozylatyn baıqaý osymen altynshy ret uıymdastyrylyp otyr. 32 biliktilik boıynsha 160-tan astam oqýshy, 250 sarapshy qatysyp jatqan bilim jarysynyń jeńimpazdary osy aptanyń aıaǵynda anyqtalady.
Aımaqta muǵalimderdiń biliktiligin jetildirý, eńbegin baǵalaý, moraldyq, materıaldyq turǵydan qoldaý kórsetý máseleleri basty nazarda. Mysaly, respýblıkalyq «Úzdik pedagog» konkýrsynyń oblystyq kezeńinde jeńiske jetken 6 muǵalimge 800 myń teńgeniń ústinde aqshalaı syıaqy berilip, jeńimpazdar arnaıy dıplomdarmen jáne sertıfıkattarmen marapattalǵan. Basqarma basshysynyń aıtýynsha, bıyl muǵalimderdiń áleýmettik mártebesin arttyrýǵa erekshe kóńil bólinip otyr.
Qostanaı oblysy