Jaqynda «Qazaqstan temir joly» UK» AQ basqarma tóraǵasy Saýat Myńbaev pen «Qytaı temir joldary» dırektorlar keńesiniń tóraǵasy Lý Dýnfýdyń beınekonferensııa formatyndaǵy júzdesýinde eki el arasyndaǵy temir jolda júk tasymalynyń oń qarqyn kórsetip otyrǵany aıtyldy. Qazaqstan men QHR temir jol basshylary Dostyq – Alashańqaı jáne Altynkól – Qorǵas shekaralyq ótpeleri arqyly tasymal kólemin arttyrýdy qamtamasyz etýge erekshe nazar aýdarylyp otyrǵanyna toqtaldy.
2020 jylǵy 30 qyrkúıekte qazaqstandyq BAQ úshin KTZE-Khorgos Gateway Qurǵaq portyna jáne Altynkól shekaralyq temir jol stansasynda baspasóz týry ótti. Týrǵa qatysýshylarǵa Qazaqstan – Qytaı shekarasynda júk aǵyndaryn jedel ótkizý úshin «QTJ» UK» AQ qurǵan zamanaýı ınfraqurylym tanystyryldy. KTZ Express AQ mýltımodaldyq kompanııasy operatory bolyp otyrǵan KTZE-Khorgos Gateway logıstıkalyq haby – Qazaqstan men Qytaı shekarasyndaǵy «Qorǵas – Shyǵys qaqpasy» arnaıy ekonomıkalyq aımaǵynyń aýmaǵynda strategııalyq tıimdi jerde ornalasqan Ortalyq Azııadaǵy eń iri qurǵaq port sanalady.
Qurǵaq port aýmaǵynda jalpy aýdany 102,8 gektar joǵary klasty logıstıkalyq servısti qamtamasyz etý úshin jalpy uzyndyǵy 24 shaqyrym temir jol joldary, konteınerlerdi, basty júkterdi, avtomobılder men jabdyqtardy qaıta tıeý boıynsha tıeý/túsirý jumystaryna arnalǵan konteınerlik termınalda 6 kirme jol, birjolǵy saqtaýǵa arnalǵan 18 myńnan astam mamandandyrylǵan konteınerlik alań ornalasqan. Onda 2 ýaqytsha saqtaý qoımasy, jalpy aýdany 10 myń sharshy metr, 1400 sharshy metr tehnıkany, onyń ishinde refrejıratorlyq konteınerlerdi jóndeý jáne qyzmet kórsetý sheberhanasy, sondaı-aq avtomobılderdi tar jáne keń joltabandarmen túsirýge arnalǵan apparelder bar.
Qurǵaq port Altynkól stansasyndaǵy eń qýatty termınal sanalady. Bul qazirgi zamanǵy qaıta tıeý tehnıkasymen, vagondar men konteınerlerdi esepke alýdyń jańa avtomattandyrylǵan júıesimen jabdyqtalǵan jáne Qazaqstan – Qytaı shekarasy arqyly ótetin júkterdi óńdeý, saqtaý jáne aýystyryp tıeý salasynda qyzmetterdiń tolyq spektrin kórsetedi.
KTZ Express AQ Logıstıka jónindegi vıse-prezıdenti Nurlan Igembaevtyń aıtýynsha, Qytaıdan Eýropaǵa, Reseıge jáne Ortalyq Azııaǵa baratyn marshrýttar dástúrli túrde Qazaqstan aýmaǵy arqyly ótetin eń suranysqa ıe baǵdarlar.
«2020 jylǵy qańtar-tamyz aılarynda Qytaı – Eýropa – Qytaı baǵyty boıynsha tasymaldaý kólemi 306,6 myń JFE qurady, bul 2019 jylǵy osy kezeń kólemderimen salystyrǵanda 62%-ǵa ósti; Qytaı – Ortalyq Azııa-Qytaı baǵyty boıynsha ósim 29%-dy nemese 149,2 myń JFE qurady; esepti kezeńde Qytaıdan Reseıge 31,2 myń JFE tasymaldandy, ósim ótken jyldyń uqsas kezeńimen salystyrǵanda 47%-dy qurady. Eger Altynkól stansasy men Qurǵaq port arqyly tasymaldanatyn júkterdiń nomenklatýrasy týraly aıtatyn bolsaq, bul – halyq tutynatyn taýarlar, metaldar, hımıkattar jáne gabarıtti emes júkter, mysaly, bıyl qyrkúıek aıynda KTZE-Khorgos Gateway Qurǵaq portynyń tıeý termınalyn iske qosý arqyly Qytaıdan Túrikmenstanǵa 300 gabarıtti emes tehnıka – John Deere aýyl sharýashylyǵy kombaındary jiberildi. Aıta ketelik, John Deere kompanııasy 2017 jyldan bastap aýyl sharýashylyǵy tehnıkasyn tasymaldaýǵa bizge senim bildiredi. Yntymaqtastyqtyń úsh jyly ishinde 1 474 kombaındy tasymaldadyq. Al Altynkól stansasy arqyly bıyl birqatar jańa konteınerlik marshrýttardy iske qostyq. Bul Szınhýa (QHR) – Baký (Ázerbaıjan), Sıan (QHR) – Izmır (Túrkııa) Transkaspıı halyqaralyq kólik baǵyty boıynsha Chensıan (QHR) – Jodıno (Belarýs), Szınan Nan (QHR) – Qypshaq (Túrikmenstan), Túrkmenbashy (Túrikmenstan) – Sındao (QHR), sondaı – aq Altynkól – Máskeý túıini stansasynyń turaqty konteınerlik servısi», dedi N.Igembaev.
Onyń aıtýynsha, KTZ Express AQ kompanııasy búgingi tańda eń qolaıly tarıftik sharttardy jasap, Qazaqstan arqyly ótetin barlyq baǵyttaǵy júkterdiń jyldamdyǵy men saqtalýynyń tolyq parametrlerin usynyp otyr. Uzyndyǵy 3128 shaqyrymdy quraıtyn Altynkólden Aqtaý portyna deıingi ýchaskeni konteınerler úsh táýlik ishinde ótedi, al 2019 jylǵy 16 sáýirden bastap «Qazaqteńizkólikfloty» kompanııasynyń fıderlik kemesi apta saıyn Baký portyna 210-ǵa jýyq konteıner jetkizedi, sol jerden júkter temir jol arqyly Grýzııa men Túrkııaǵa jóneltiledi. Mysaly, qytaılyq Sıannan Túrkııanyń Ystanbulyna deıingi sapardyń jalpy ýaqyty 16 kúndi alady», dep qosty ol.
Altynkól beketine sapar barysynda «QTJ-Júk tasymaly» JShS Almaty bólimshesi JT» fılıalynyń Altynkól stansasy bastyǵynyń mindetin atqarýshy Nurjan Qurmanáliuly Jetigen – Memlekettik shekara ýchaskesinde ornalasqan klastan tys júk stansasynyń jumysy týraly áńgimeledi.
«Bul 2012 jyly ashylǵan ekinshi Qazaqstan – Qytaı temir jol ótkeli. Stansa arqyly Qytaıdan Eýropaǵa, Parsy shyǵanaǵy elderine, Ortalyq Azııaǵa, Kavkazǵa júk aǵyny ótedi. 2020 jyldyń 8 aıynda stansa arqyly barlyq sanıtarlyq-epıdemııalyq normalarǵa sáıkes 1 551 konteınerlik poıyz ótti, bul 2019 jylmen (736 konteınerlik poıyz) salystyrǵanda 110,7% artyq. Osy kezeńde tar jol boıynsha 2600-den astam júk poıyzy, keń jol boıynsha 3500-den astam poıyz qabyldandy, ótken jyldyń uqsas kezeńimen salystyrǵanda ósim 55%-dy qurady. Keń jol boıynsha 3500-den astam poıyz jóneltildi, bul 2019 jylǵy kórsetkishten 49%-ǵa joǵary. Qańtar-tamyz aılarynda júk aınalymy 4 mln tonnaǵa jetti, bul ótken jyldyń sáıkes kezeńimen salystyrǵanda 55%-ǵa joǵary», dedi N.Qurmanalıuly.