Jańaqorǵan aýdanynda «Jańarǵan Jańaqorǵan jastary» atty qoǵamdyq qor bar. Ondaǵy jastar biraz jyldan beri bastama kóterip, áleýmettik jaǵdaıy tómen jandarǵa járdem berip keledi. Osy ýaqytqa deıin baspanadan qıyndyq kórgen birtalaı otbasyna kóp kómegimen úı salýdy da uıymdastyrǵan osy qor músheleri. Bıyl indet órship, el qınalǵan tusta jastar túrli shara arqyly kópke kómegin tıgizdi.
Tamyz aıynyń basynda aýdan ortalyǵynda turatyn taǵy bir kópbalaly otbasyn qamqorlyqtaryna aldy. Eski úıdiń ornyna jańa baspana soǵýǵa qareket jasaǵan jandarǵa qoldaý tanytyp, esik pen edenin, shıferin jetkizip berdi. Jas kásipker Baqytjan Dándibaev bórene túsirip berse, atyn atamaýdy suraǵan taǵy bir jomart jan shatyrǵa qajetti aǵashtaryn jetkizipti.
Osy jazda aıaqasty kóterilgen daýyl kenttegi Saıajaı shaǵyn aýdanyndaǵy A.Kósherbaevanyń úıiniń shatyryn ushyryp ketken bolatyn. Naýqas balasy bar ana jańbyrly kúnderi úıdiń tóbesinen aqqan sý edenine jetkende kópten kómek surapty. «Jańarǵan Jańaqorǵan jastary» bul ótinishti de aıaqsyz qaldyrǵan joq. Top belsendileri Dáýlet Turabaev pen Narjan Moldabekov erikti jastardyń kómegimen jylý jınady. Az ýaqyttyń ishinde qajetti materıaldar alyp, úıdiń shatyryn qaǵyp berdi.
Kópke kómegin tıgizip júrgen keıingi tolqynnyń ıgi isteri eskerýsiz qalǵan emes. Bıyl «Jomart júrek» syılyǵyn tabystaýǵa arnalǵan sharada top múshesi Qoǵambek Mútanuly «Eren eriktilik» nomınasııasymen marapattaldy.
Jańa oqý jyly bastalar sátte «Jańarǵan Jańaqorǵan jastary» qoǵamdyq qorynyń uıymdastyrýymen «Mektepke jol» qaıyrymdylyq aksııasy ótti. Aksııa aıasynda áleýmettik jaǵynan az qamtylǵan otbasy balalaryna oqýǵa qajetti qural-jabdyqtar salynǵan 90 sómke tabystaldy. Onlaın oqýǵa qajetti qurylǵy tappaı qınalyp otyrǵandar balalarǵa 14 smartfon alyp berdi.
– Kómekke shyn muqtaj adamnyń meselin qaıtaryp, qolyn qaqqan kezimiz joq,– deıdi qor múshesi, aýdandyq máslıhat depýtaty Arman Májıtov. – Biraq memleketten de, aınalasynan da únemi kómek dámetip, sony kásip qylyp alǵandar da joq deı almaımyz. Sondyqtan da biz «Qınalǵanǵa balyq emes, qarmaq ber» degen ustanymdamyz. Osy baǵytta ózara aqyldasyp, aldaǵy ýaqytta qolynan is keletin, biraq materıaldyq múmkindigi joq jandarǵa qajetti qurylǵylaryn alyp berip, kásip bastaýyna jol ashpaqpyz.
Jastar óz qatarlaryn kásipke baýlý baǵytynda da túrli sharalar uıymdastyryp keledi. Mysaly, jýyrda qoǵamdyq qor men «Qamqor» áleýmettik dúkeni kondıterlik ónimder pisirýden tegin sheberlik saǵatyn ótkizdi. Kóp uzamaı «Jastar resýrstyq ortalyǵy» KMM-nyń qoldaýymen qor men áleýmettik dúken otbasylyq saıys uıymdastyrdy. Otbasy qundylyqtary men salamatty ómir saltyn nasıhattaýǵa arnalǵan sharada qatysýshy komandalar baǵaly syılyqtarmen marapattaldy. Bas júldege berilgen velosıped Ibragımovter otbasyna buıyrdy.
Jastardyń bastamasymen árbir juma kúni áleýmettik dúkende «Tegin nan» qaıyrymdylyq aksııasy turaqty ótkizilip keledi.
Qyzylorda oblysy