Shákirti bıikten kórinse ustaz mereıi artady. Ámbe bilim ordasynyń básekege qabiletiligi túlekteriniń deńgeıimen ólshense kerek. Tarıhy tereń, taǵylymy mol «Daryndy balalarǵa arnalǵan úsh tilde oqytatyn M.Aryn atyndaǵy №24 «Ekonomıka jáne bıznes» arnaýly lıseıi sol údeden shyǵyp keledi. Búginde Taldyqorǵan qalasynda ornalasqan bilim shańyryǵy elimizdegi eń tańdaýly mektepterdiń biri.
Túlep ushqan túlekteri sapaly bilimniń nátıjesinde memlekettik testen súrinbeı ótip, tegin oqýǵa joldama alatynyn buǵan deıin aqparat quraldary jarysa jazǵan bolatyn. 2015 jyldan beri UBT nátıjesimen óńir kóleminde kósh bastap, Qazaqstannyń úzdik 27 matematıkalyq mektepter qataryna qosyldy.
Jalpy, lıseıde 62 muǵalim qyzmet etedi. «Y.Altynsarın» tósbelgisiniń ıegeri, lıseı dırektory Marııa Galıeva bastaǵan bilikti mamandar tálimdi shákirt tárbıelep, kóptiń ystyq yqylasyna ıe bolyp júr. Atap aıtsaq, Marzııa Kojageldınova, Týǵanaı Aıapova, Murat Býlanov, Gúlbarshyn Dolaeva, Saltanat Ibraeva, Ryshan Baıshyǵashova, Qısa Maýlet, Baqyt Nurǵojaeva, Kamıda Týlemetova, Zııaly Abılova, Gaýhar Asylbekova syndy ulaǵatty ustazdar toptasqan ujymnyń berekesi jarasqan. Qazirgi qashyqtan oqytý tehnologııasy negizinde «Daryn.online» platformasyn keńinen qoldanyp, aýdıo-sabaqtar arqyly oqýshylardyń bilimin jetildirýde.
Lıseı muǵalimderiniń «You Tube» kanalyndaǵy onlaın sabaqtary da búginde eń qajetti resýrs kózi bolyp tabylady. О́z kanaldary arqyly tájirıbelerin ortaǵa salyp, oqýshylarǵa tıimdi aqparattar taratyp jatyr. Bıylǵy bilim salasyndaǵy ózgeristerge qaramastan, 2019-2020 oqý jylynda bitirgen 61 oqýshynyń 56-sy memlekettik grantty qanjyǵalaǵan. Bul elimizdegi eń úlken nátıje. Oǵan halyqaralyq baıqaýlar oryn alǵan oqýshylaryn qosyp salmaqtap kórińiz.
Balalarynyń jetken jetistikterine rıza bolǵan ata-analardyń mektep ujymyna aıtar alǵysy sheksiz. Ataqty ǵalym Muhtar Arynnyń esimin arqalaǵan bilim ordasynyń áli de úlken belesterdi baǵyndyraryna senemiz.