Parlament Senatynyń tóraǵasy Máýlen Áshimbaev ustazdar qaýymyn kásibı merekelerimen quttyqtady, dep habarlaıdy Egemen.kz
"Elimizdegi barsha ustazdar qaýymyn búgingi kásibı merekelerimen quttyqtaımyn! "Ustazdyq etý – uly qyzmet"degen qanatty sóz bar. Shyn máninde, áli oń-solyn tolyq tanyp úlgermegen balanyń ómirden óz ornyn taýyp, adam bolyp qalyptasýynda muǵalimniń eńbegi zor. Sondyqtan ustazǵa qurmet kórsetý – árqaısymyzdyń azamattyq paryzymyz. Búgingideı kúrdeli kezeńde muǵalimderimizge de az salmaq túsip otyrǵan joq. Soǵan qaramastan jastarymyzdyń sapaly bilim alýyna bar kúsh-jigerin jumsap júrgen ardaqty jandarǵa alǵysymyz sheksiz. Ustazdarymyz osyndaı syn saǵatta esh moıymaı, ult bolashaǵyn bárinen bıik qoıyp, óz kásibine degen adaldyqtyń ozyq úlgisin kórsetip keledi", dedi Senat tóraǵasy.
Sonymen qatar ol qazirgi tańda memleket tarapynan muǵalimder úshin barlyq jaǵdaı jasalyp jatqanyn atap ótedi.
"Oǵan "Pedagog mártebesi týraly" zańnyń qabyldanýy aıqyn dálel. Prezıdentimizdiń bıylǵy Joldaýynda da bilim berý isi el damýynyń eń negizgi basymdyqtarynyń biri ekeni aıtyldy. Sonyń aıasynda muǵalimderdiń jalaqysyn kóterý, bolashaq pedagogterdiń stıpendııasyn kóbeıtý sııaqty mańyzdy mindetter júzege asyrylyp jatyr. Osyndaı ıgi bastamalar aldaǵy ýaqytta da jalǵasa beretini anyq. Barsha ustazdarymyzdy kásibı merekelerimen quttyqtaı otyryp, jumystaryna tolaıym tabys, shańyraqtaryna shattyq tileımin. Jetistigimen qýantar shákirtterińiz kóp bolsyn!", dedi Máýlen Áshimbaev.