Aldaǵy qysqa daıyndyq san taraý máseleni qamtıdy. Sonyń ishinde jol da bar. Oblystyq jolaýshylar kóligi jáne avtomobıl joldary basqarmasynyń basshysy Áset Orazǵalıevtiń málimetine súıensek, munaıly óńirdegi joldyń uzyndyǵy 3 047 shaqyrymdy qurap otyr. Onyń ishinde respýblıkalyq mańyzdysy – 1 120 shaqyrym. Al 838-i – oblystyq, 1 089-y aýdandyq deńgeıdegi joldar.
Árıne jolǵa da kútim kerek. Áıtpese joldyń búlinýine kún raıy da, aýyr júk kólikteriniń salmaǵy da áser etetini daýsyz. Sol sebepten óńir joldaryna kútim jasaý úshin 2020-2022 jyldarǵa arnalǵan konkýrs ótip, merdigerler anyqtalypty. Máselen, Qurmanǵazy aýdanyndaǵy joldyń uzyndyǵy 330 shaqyrymdy quraıdy. Bul joldyń búlinbeýin «Qurmanǵazy joldary» JShS mindetine alyp otyr. Qazir atalǵan seriktestikpen ekijaqty kelisimshart jasaldy. Soǵan sáıkes seriktestik qysta joldy qardan tazalaý úshin avtogreıderler, tıegish mashına, ózge de tehnıkalardy, 50 tonna janar-jaǵarmaı qoryn daıyndapty.
Al Qyzylqoǵa aýdanyndaǵy 244 shaqyrymdyq joldyń kútimi «Jańa arna» JShS-ne júktelipti. Bul seriktestik te alaı-dúleı boran, qalyń qar sekildi tabıǵattyń tosyn qubylysy kezinde jol tazalaıtyn arnaıy tehnıkalarmen qamtylypty. Sondaı-aq Inder, Mahambet, Isataı, Jylyoı, Maqat aýdandarynyń aýmaǵymen ótetin oblystyq mańyzy bar joldardyń kútimin «QENES ENGINEERING» JShS júrgizbek. Osyǵan oraı seriktestik ujymy qar tazalaýǵa qajetti arnaıy tehnıkalar men jolǵa sebetin 500 kılo tuz, 40 tonna qum, 35 tonna qıyrshyq, malta tasty daıyndap otyr.
Batys óńirdegi halyqaralyq mańyzy bar joldyń biri – «Aqtóbe – Atyraý – Reseı shekarasy» baǵytyndaǵy jol. Buryn bul jolmen júrýdiń azaby kóp edi. О́ıtkeni jol ábden tozyp, kóliktiń júrýine kedergi kóbeıdi. Onyń ústine jol apaty jıilep, jolaýshylardyń zardap shegýi jıilegen bolatyn.
– Qazir «Aqtóbe – Atyraý – Reseı shekarasy» jolynyń 424 shaqyrymyna qaıta jańǵyrtý jumystary júrgizilip jatyr. Bizdiń fılıal atalǵan joldyń 699 shaqyrymyn qadaǵalaýǵa alyp otyr. Bıyl kólikterdiń úzdiksiz ári qaýipsiz qozǵalysyn qamtamasyz etý maqsatynda 456 shaqyrym joldyń jıeginde ósken shóp shabyldy. Sondaı-aq 21 123 sharshy metrdi quraǵan jol shuńqyry biteldi. Jol boıynda 20-30 shaqyrym saıyn eskertý belgileri ornatyldy. Búginde jol boıynda osyndaı 104 belgi bar, – deıdi «QazAvtoJol» UK» AQ Atyraý oblystyq fılıalynyń dırektory Jańabaı Basharov.
Atyraý oblysy