Kýveıt Ámiri sheıh Sabah ál-Ahmad ál-Djaber As-Sabah 91 jasynda ómirden ozdy. Ol memleketti on tórt jyl basqardy. Sońǵy jyldary densaýlyǵy syr bergen kórinedi. Aımaqtaǵy qaqtyǵystardy sheshýge qosqan úlesi úshin ámirshige degen qurmet te joǵary boldy.
Sabah 1929 jyly qazirgi Kýveıt memleketiniń qurylýy kezinde el monarhynyń otbasynda dúnıege kelgen. Ol 40 jyl boıy syrtqy ister mınıstri qyzmetin atqarǵan, al ámir atanǵanǵa deıin premer-mınıstr boldy. Kýveıt ámirshisiniń ómirden ozýyna baılanysty kóptegen eldiń kóshbasshylary men halyqaralyq uıymdardyń jetekshilerinen kóńil aıtý hattary kelip túsken. Qazaqstan Prezıdenti de sýyt habardy tereń kúızelispen qabyldaǵanyn jetkizdi.
Kýveıt memleketiniń jańa ámirshisi bolyp 86 jastaǵy sheıh Naýýaf ál-Ahmad ál-Djaber As-Sabah taǵaıyndaldy. Ol aǵasy júrgizgen saıasattyń árdaıym úlgi bolyp qalatynyn jetkizdi. Jalpy bul kóshbasshylyq kezeńde asa iri saıası ózgeristerdiń bolmaıtyny aıtylýda.