Aıtmatovtyń adastyrmas «Qus joly»

Teatr ujymy atalǵan týyndyny áýeli mamyr aıynda sahnalap, Jeńistiń 75 jyldyǵyna tartý etýdi kózdegen. Alaıda karantın kedergi bolyp, kórermen kópten kútken qoıylymmen kúzde ǵana qaýyshyp otyr.

Qyrǵyz rejısseri adamzat tarıhynda qanmen jazylyp qalǵan surapyl soǵystyń óshpes zardaby men ólsheýsiz qaıǵy-qasiretin qoıylymnyń bas keıipkeri – Tolǵanaıdyń talaıly taǵdyry arqyly shynaıy ashyp kórsete bilgen. Tolǵanaı – aıaýly jary men endi ǵana er jetken úsh birdeı uly maıdanda qaza tapqan qusaly ana. Kókiregindegi sheri tas bolyp qatqan baqytsyz áıel. Jalǵyz al­danyshy – jastaı jesir qalǵan jalǵyz kelini men kolhozdyń aýyr sharýasy ǵana. Qoıylym barysynda soǵys jyldaryndaǵy aýyl turmysy men tyldaǵy áıelderdiń jankeshti eńbegi kóremenniń kóz aldynan tizbektele ótip, sahnada el basyna kún týǵan qıyn-qystaý kezeńdegi adaldyq pen opasyzdyq, qatygezdik pen súıispenshilik sııaq­ty kereǵar qasıetterdiń taı­talasy tarazy basyna tarty­lady. Sahnalyq týyndynyń kórkemdik sheshimi Tol­ǵanaı Ana men Jer Ananyń dıalogy arqyly kórinis tapqan.

Spektakl keıipkerlerin kileń jas akterler somdaǵan. Kópshiliktiń kózine jas úıirtip, kórermender zalyn álsin-álsin shyqqan kúrsiniske toltyrǵan áserli týyndynyń sátti sahnalanýyn teatr ártisteriniń she­berligine telidik.

Jańa maýsymnyń ashylý saltanatynda teatr ujymyn mádenıet basqarmasynyń basshysy Erlan Qalmaqov quttyqtady.

– Jeti aıdan artyq úzilisten keıin ártis pen kórermen qaıta qa­ýysh­qan tamasha kesh bolyp jatyr. Qatary jas mamandarmen tolyqqan teatr trýppasy óziniń joǵary kásibı deńgeıin taǵy bir márte dáleldep, repertýaryn kesek týyndymen to­lyqtyryp otyr. Aldaǵy ýaqytta teatrdyń 20 jyldyq me­reıtoıyn keń kólemde atap ótip, óner qaı­ratkerlerine qurmet kór­setýdi kózdep otyrmyz, – dedi bas­qarma basshysy.

Kórermen qaýym úzilis ke­zinde taıaýda ǵana ashylǵan teatr mu­ra­jaıyn tamashalap, óner orda­synyń tarıhymen tanysty.

Qostanaı oblysy