Úlkendi qurmettep, kishilik izetin tanytýdy jazylmaǵan zańy sanaıtyn halqymyz izgi dástúrinen qandaı jaǵdaıda da jańylmaı keledi. Oǵan 1 qazan – «Halyqaralyq qarttar kúni» merekesi qarsańynda Mańǵystaý oblysy boıynsha QAJ departamentine baǵynysty GM-172/6 mekemesinde jazasyn ótep jatqan qart sottalǵandardyń nazardan tys qalmaı, mereke kúni óz basshylyǵy men áriptesteriniń qurmetine bólenýi dálel.
Ataýly merekeni jazasyn óteýshiler úlken daıyndyqpen, kóterińki kóńil kúımen atap ótti. Mekeme ákimshiliginiń uıymdastyrýymen klýbta merekelik konsert uıymdastyrylyp, qart sottalýshylardyń qurmetine arnalyp óleńder men merekelik ánder, kóńildi quttyqtaýlar, mýzykalyq slaıd-shoýlar, sahnalyq qoıylymdar kórsetildi.
Merekelik is-sharany mekeme bastyǵynyń tárbıe jumystary jónindegi orynbasary, ádilet maıory Azat Shabıkov resmı túrde ashyp, egde jastaǵy sottalǵandardy aıtýly merekemen quttyqtap, olardyń otbasyna aman-esen oralýyna tilektestik bildirdi.
– Halyqaralyq qarttar kúni qarsańynda mekemede jalpy sany 15 aǵa býyn sottalǵandarǵa erekshe qurmet kórsetilip, mekeme bastyǵynyń buıryǵymen marapattaldy. Qarttarǵa qashanda, qaı jerde júrse de qurmet kórsetýge tıistimiz, basyna is túsken adamdardyń otbasynan tys, arnaıy mekemede jazasyn óteýshi ekendigi olarǵa degen yqylasty, qurmetti joqqa shyǵara almaıdy, deıdi mekeme bastyǵynyń tárbıe jumystary jónindegi orynbasary, ádilet maıory Azat Shabıkov.
Merekelik sharaǵa qarttar da, uıymdastyrýshylar da rıza. Jazasyn óteýshiler tek qarttar kúninde emes, ózge de mańyzdy merekelerdi taǵylymdy, mazmundy sharalarmen atap ótýdi jón sanaıdy.
Mańǵystaý oblysy