2021 jylǵa qaraı medısınalyq maskalar óndirisiniń kólemi táýligine eki ese, eki mıllıon danaǵa deıin ulǵaıady. Bul týraly Indýstrııa jáne ınfraqurylymdyq damý mınıstri Beıbit Atamqulov aıtty, dep habarlaıdy Egemen.kz.
"Birinshiden, quny 180 mln AQSh dollaryn quraıtyn keminde 30 jańa óndiristi iske qosyp, 2 myń jańa turaqty jumys ornyn ashý josparlandy. Ekinshiden, farmasevtıka salasynyń óndiris kólemi 2,5 esege artyp, 92 mlrd-tan 230 mlrd teńgege deıin jetedi. Oǵan qosa, 2021 jyldyń birinshi toqsanyna qaraı otandyq kásiporyndardyń bir rettik maska boıynsha óndiristik qýaty táýligine 2 esege ulǵaıyp, 1 mln nan 2 mln danaǵa deıin, qorǵanys kostıýmderi boıynsha 2 esege artyp, aıyna 500 myńnan 1 mln danaǵa jetedi. Sondaı-aq jyl sońyna qaraı qolǵap boıynsha óndiris kólemi táýligine 330 myńnan 530 myńǵa deıin ulǵaıtylady", dedi ol.
Sondaı-aq mınıstr dárilik zattar eksportynyń kólemi úsh ese - 58-den 174 mıllıon dollarǵa deıin ósetinin aıtty.
"Joǵaryda atalǵan barlyq is-sharalardyń oryndalýy Qazaqstannyń ishki naryǵyndaǵy otandyq óndirýshiler óniminiń úlesin birinshi kezekte qajetti dárilik zattar boıynsha aǵymdaǵy 39-dan 50 paıyzǵa deıin arttyrýdy qamtamasyz etedi, bul DDU usynymyna sáıkes keledi", deıdi mınıstr.