Nura aýdanyndaǵy Kóbeteı aýylynyń turǵyny Serik Bákirovtiń turyp jatqan baspanasy saman kirpishten soǵylǵan eski úı-tuǵyn. Taıaýda, qaıyrymdy jandardyń qamqorlyǵynyń arqasynda tórt balasy bar jalǵyzbasty osy azamat jańa úıge ıe bolyp, qonys toıyn toılady, – dep habarlaıdy Egemen.kz oblys ákiminiń baspasóz qyzmetine silteme jasap.
Jaqsy iske muryndyq bolǵan "Hareket" qaıyrymdylyq qory eken. Atalǵan qordyń ókili Azamat Muqashev otbasynyń eki bólmeli eski saman úıde turyp jatqanyn estigennen keıin, ózi bas bolyp, jańa baspana alýǵa qarajat jınaǵan. Sonyń nátıjesinde Bákirovter otbasy bes bólmeli jańa úıge qol jetkizdi.
Jalǵyzbasty áke Serik Bákirovtiń úlken uly jıyrmaǵa bıyl kelgen. Kenjesi toǵyz jasta.
"Qorǵa jáne bizge qol ushyn berip, kómekteskenderdiń barlyǵyna rahmet. Eń bastysy, úıdiń janynda baý-baqsha ósiretin úlken jer telimi bar eken. Balalarym kókónis egip, eńbektiń qadirin jasynan túsinip ósetin boldy", – deıdi qýanyshy qoınyna syımaǵan jalǵyzbasty áke.
Budan bólek, oblystyq qaıyrymdylyq qorynyń bólimshesi habarlaǵandaı, izgi nıetti jandardyń kómeginiń arqasynda bıyl "15 kúnde 30 úı" aksııasy aıasynda qaraǵandylyq taǵy da tórt otbasy qonys toıyn toılady.
Qaraǵandy oblysy