Jambyl oblysynyń ákimi Berdibek Saparbaev bazarlardyń belgilengen talaptarǵa tolyq sáıkes kelmeıtinin aıtty, dep habarlaıdy Egemen.kz oblys ákiminiń baspasóz qyzmetine silteme jasap.
Kásipkerlik jáne ındýstrıaldy-ınnovasııalyq damytý basqarmasynyń basshysy Aspandııar Seısebaevtyń aıtýynsha, oblys boıynsha 41 bazar tirkelgen, onda 12 myńnan astam adam jumys isteıdi.
- Halyq arasynda júrgizilgen saýalnama nátıjeleri turǵyndardyń taýarlardy negizinen bazardan satyp alatynyn kórsetip otyr. Máselen, azyq-túlik taýarlary kóleminiń 64 paıyzy, azyq-túlik emes taýarlar kóleminiń 73 paıyzy, tehnıkaǵa qajetti bólshekterdiń 81 paıyzy jáne qurylys materıaldarynyń 85 paıyzy bazarlardan satyp alynady, - dep atap ótti A.Seısebaev.
Tutynýshylardyń kóptigin eskersek, bazarlardaǵy qyzmet kórsetýdiń zamanaýı talaptarǵa saı bolýy asa mańyzdy. О́kinishke oraı, ázirge olar talapqa saı dep aıta almaımyz.
- Barlyq bazarlar órtke qarsy, sáýlettik, sanıtarlyq, ekologııalyq jáne basqa da talaptarǵa saı bolýy tıis. Biraq birde-bir bazar ıesi buǵan naqty jaýap bere almaıdy. Saýda ashyq jerde júrgizilýde, órt gıdranttary kórinbeıdi, órt sóndirý mashınalary erkin óte almaıdy. Bazar ıeleri satyp alýshylar men saýdagerlerge de jaıly jáne qaýipsiz jaǵdaı jasaýdy oıǵa da almaıdy. Al, memlekettik organdar eshqandaı másele joq sekildi beıqam, tipti, bul jaǵdaıdaǵy tártipti retteýge tyryspaıdy, - dep ashýlandy Berdibek Saparbaev.
A.Seısebaev atap ótkendeı, sońǵy eki jylda jeti bazar («Nurly», «Ysty», «Saltanat», «Qaıqarmet», «Arzan», «Aýyl Bereke», «Jibek Joly») jańǵyrtylyp, jabyq pavılondar ornatylyp, qaqpalar qoıylǵan.
Aımaq basshysy bul sharalarmen toqtap qalýǵa bolmaıtyndyǵyn aıtyp, jańǵyrtýdy sońyna deıin jetkizýdi tapsyrdy. Osyndaı jumystar basqa da bazarlarda júrgizilýde, dengenmen ıeleri ýaqytty sozyp, áli kúnge jańa saýda qatarlarynyń eskızderin usynbaýda. Kóptegen kásipkerler qarajattyń joqtyǵyna shaǵymdanyp, modernızasııalaý jumystary eki-úsh jylda aıaqtalatyndyǵyn tilge tıek etti.
- Eshqandaı syltaý qabyldanbaıdy. Barlyq bazarlar tezirek retke keltirilýi kerek. Barlyq bazarlar úshin biryńǵaı ólshemder bekitilgen. Olar: nysandardyń sanıtarlyq-epıdemıologııalyq standarttarǵa jáne órt qaýipsizdigi talaptaryna, qalanyń arhıtektýralyq kelbetine sáıkestikteri, eldiń salyq zańnamasyn saqtaý jáne POS-termınaldary men kassalyq apparattarynyń bolýy, - dep talap etti oblys ákimi.
Ol tótenshe jaǵdaılar jáne memlekettik kirister departamentteri bul jaǵdaılarǵa bas aýyrtpaıtynyn basa aıtty. Oblys ákiminiń tapsyrmalarynyń oryndalýyn arnaıy mobıldi top qadaǵalap otyrýy tıis. Top quramyna joǵaryda atalǵan departamentter men salalyq basqarma ókilderinen bólek, polısııa qyzmetkerleri, sanıtarlyq dárigerler, sáýletshiler enedi. Jıynǵa beıne-baılanys rejıminde qatysqan aýdandar men oblys ortalyǵynyń ákimderine de osy máselelerdi sheshý boıynsha jumystar júrgizý tapsyryldy.
Basqosýda aımaq basshysy azyq-túlik qaýipsizdigi máselesine aıryqsha kóńil bóldi.
"Turaqtandyrý qorynyń qoımalarynda ónimdi saqtaýǵa qatysty barlyq máselelerdi kóktemde sheshý qajet edi. Sonda tıisti vedomstvo búgingi baǵalardyń ósýin boldyrmaý úshin birneshe myń tonna aýylsharýashylyq ónimderin satyp alar edi. Dıqandar mol ónim jınady. Biraq olardy saqtaıtyn oryn joq. Sondyqtan ónimder qazir basqa aımaqtarǵa arzan baǵada satylýda. Al ishki naryq tolyǵymen qamtyldy dep aıta almaımyz. Aýyl sharýashylyǵy basqarmasy jaǵdaıdy baqylaı almaı otyr", - dep oblys ákimi basqarma jumysyn synǵa aldy.
Sonymen qatar ol deldaldarǵa qatysty máseleni de sheshýdi talap etti.
"Sharýalar somanyń jartysyn ortadaǵy deldaldarǵa berýge májbúr. О́ıtkeni ózderiniń tikeleı satýǵa múmkindigi joq. Osylaısha ortadaǵylar ońaı aqsha tabýda, olar salyq tólemeıdi", - dep atap ótti Berdibek Saparbaev.
Sondaı-aq óńir basshysy azyq-túlik tapshylyǵy men baǵanyń ósýine jol bermeý úshin sharalar qabyldaýdy tapsyrdy.