Búgin, 10 qarasha kúni Astanadaǵy «Astana-Arena» sport kesheninde bolyp ótken Qazaqstannyń 2013 jylǵy Kýbogy úshin fınaldyq oıynda Tarazdyń «Taraz» komandasyn 1:0 etip utqan Qaraǵandynyń «Shahteri» osy tartýǵa qol jetkizdi. Kenshiler komandasyna Kýbokty matchty arnaıy kelip kórgen Qazaqstan Respýblıkasynyń Prezıdenti Nursultan Nazarbaev óz qolymen tabys etti.
Qaraǵandylyqtardyń bul kezdesýdiń nátıjesine aıryqsha mán bergeni onyń bastalǵan shaǵynan aıqyn baıqaldy. Olar alańdaǵy arbıtrdyń ysqyryǵy estilisimen tura alǵa umtyldy. Munda sońǵy kezderi elordanyń bas alańyna boılaryn úıretip qalǵan shahterlikterdiń basymdylyǵy birtindep arta berdi.
«Shahterdiń» bul matchtan kúter úmitiniń kóp ekenin keıingi kezderi komandanyń bas jattyqtyrýshysy Vıktor Kýmykovtyń ustanǵan taktıkasy da ańǵartyp júr edi. Ol elimizdiń chempıonatynda óz shákirtteriniń júldeli oryndardan kórine almaıtyny belgili bola bastaǵan kezde bar kúsh-jigerdi birden Eýropa fýtbol alańdaryndaǵy shaıqastarǵa aýdaryp jiberdi. Sonyń arqasynda onyń jigitteri Qazaqstan komandalary arasynan birinshi bolyp Eýropa lıgasynyń toptyq kezeńinde óner kórsetý deńgeıine deıin jete aldy. Al jasaqtyń toptyq kezeńde kelesi aınalymǵa shyǵa almasyn bilgesin, Qazaqstan Kýbogy úshin aıqasty birinshi planǵa shyǵara qoıdy. Sóıtip, ol budan birqatar ýaqyt buryn kári qurlyq komandalary dodasynyń jaýapty matchtary aldynda qalaı Premer-lıga oıyndaryna kenshilerdiń ekinshi quramyn shyǵarsa, osydan birneshe kún buryn Gollandııada ótken toptyq kezeńniń kezekti oıynyna da qosalqy quramyn sala qoıdy. Bul aralyqta negizgi quram respýblıka Kýbogy úshin kezdesýge qyzý daıyndalyp jatty. Olaı bolsa, taıaýda Nıderlandy jerinde jergilikti AZ komandasynan 0:1 bolyp utylyp qaıtqan «Shahterdiń» jastar toby bolatyn.
О́zin osyndaı taktık retinde tanytqan Vıktor Kýmykovtyń komandasy fınaldyq oıynnyń barysynda qarsylasyna qaraǵanda tyńdaý kórindi. Onyń búgingi qımylyna qarap, bıyl úsh maıdanda qatar shaıqasqan komandanyń sarbazdaryn kórgendeı bola almaǵanymyzdyń bir sebebi álgindegideı ony osy kúnge baptap jetkizgen bapkerdiń eńbeginde jatyr edi. Sondyǵynan bolar, birinshi taım tolyq qaraǵandylyqtardyń belsendiliginde qaldy. Ara-tura tarazdyqtardyń sholǵyn jasap turǵandary bolmasa, negizinen basymdyq solardyń tizgininde irkilip turdy. Alaıda, kezdesýdiń birinshi bóliginde eki jaq ta esep asha almaı, teń tarqasty.
Ekinshi taımdy taǵy da «Shahter» shabýylmen órbitip áketti. Onyń oıynshylary qarsy jaqqa qysymdy burynǵydan beter kúsheıte tústi. Aqyry 53-mınýtta olar sol basymdylyqty golǵa da aınaldyryp úlgerdi. Aıtatyny joq, ol keremet bir úılesimdilikke qosa dáldikti tanytatyndaı bolyp soǵyldy. Osy jerde kenshilerdiń «Eýropa kórgenderi» anyq ańǵaryldy. Ony aıyp alańyna lyp etip jetip kelgen dopqa ózin qorshaǵan eki qorǵaýshynyń arasynan sytylyp shyǵyp, aıaǵyn tıgizip úlgergen Sergeı Hıjnıchenko túsirdi. Doptyń ushyp kelip, onyń aıaǵyna tııýi men odan qaıta serpilip, qaqpanyń toryna gúmp etip túse qalýy quddy bir bılıardtyń sharyn naǵyz qas sheberi kerimi kelisken kıımen urǵanyndaı ádemi áser qaldyrdy.
Qaraǵandy fýtbolshylary budan keıin de esepti ulǵaıtatyn múmkindikterdi talaı ret jiberip aldy. Mundaı máýritti Aleksandr Sımchevıch pen Sergeı Hıjnıchenkonyń bastarynan ótkizdi. Biraq olar Ramıl Nurmuhametovti qapy qaldyratyndaı aıla taba qoımady. Kenshiler budan keıin de birneshe ret esepti eseleýge shaq qaldy. Sonyń bárinde tarazdyqtar sońǵy sátterde qaqpalaryn goldan aman alyp qalyp jatty. Soǵan qaramastan, «Shahter» sońǵy sátke deıin shabýyldaýdan qaıtqan joq. Qorytyndyda Hıjnıchenko salǵan jalǵyz dop Kýboktyń da taǵdyryn sheship ketti.
Aıta ketý kerek, matchty elimizdiń Prezıdenti Nursultan Nazarbaevtan bólek, ÝEFA prezıdenti Mıshel Platını, onyń orynbasary Grıgorıı Sýrkıs, Reseı Fýtbol odaǵynyń basshysy Nıkolaı Tolstyh tamashalady.
Taǵy bir aıta ketetinimiz, bul «Shahterdiń» Qazaqstan Kýbogy fınalyndaǵy birinshi jeńis. Ol buǵan deıin eki ret – 2009 jáne 2010 jyldary aqtyq aıqasta utylyp qalǵan edi. Osy jeńisi arqyly qaraǵandylyqtar Eýropa lıgasyna kelesi jylǵa joldama da alyp qoıdy.
Sońǵy qosarymyz, «Shahterdi» 2011, 2012 jyldary Qazaqstannyń chempıony degen ataqqa jetkizgen Vıktor Kýmykov bıyl oǵan endi elimizdiń Kýbogyn da alyp berip otyr. Al mundaı bapkerler táýelsiz Qazaqstan fýtbolynda sanaýly ǵana.
Damır Qojamqul.