Memleket basshysy Qasym-Jomart Toqaev óziniń saılaýaldy baǵdarlamasynda Prezıdenttik jastar kadrlyq rezervin qurý qajettiligi týraly aıtqan bolatyn. Bul tapsyrma oıdaǵydaı oryndalyp, el basqarý isine aralasatyn tańdaýly jastardyń qataryna qosylýǵa umtylǵan 13 myń azamattyń arasynan baby men baǵy kelisken 300 jas otandasymyz iriktelgen edi. Ult bolyp úkilegen sol 300 azamattyń arasynda «Turǵyn úı-kommýnaldyq sharýashylyǵyn jańǵyrtý men damytýdyń qazaqstandyq ortalyǵy» AQ basqarma tóraǵasynyń orynbasary Nurbek Serikov te bar.
Bul qyzmetke jas maman naq osy Prezıdenttik jastar kadrlyq rezerviniń múshelerin qoldaý aıasynda kelgenin aıta ketý qajet. Oǵan da ózindik sebep bar. Máselen, Memleket basshysy Qasym-Jomart Toqaev jyl basynda Prezıdenttik jastar kadrlyq rezervine ótken azamattarmen kezdesýde osy jyly rezervtegi 100 adamdy jaýapty qyzmetke taǵaıyndaý, aldaǵy jyldarda kadrlyq rezervtiń áleýetin tolyq paıdalaný josparǵa qoıylǵanyn alǵa tartqan bolatyn. «Búgingi jastar – memlekettik basqarý júıesiniń bolashaǵy. Árqaısyńyzdan eldi damytýǵa tyń serpin beretin jańa ıdeıa men nátıjeli jumys kútemiz. Aldaǵy ýaqytta sizderdi memlekettik organdar men ulttyq kompanııalarǵa jaýapty qyzmetke jiberemiz», dedi Q.Toqaev.
Bul rette, Prezıdent kadrlyq rezervke ótý – joǵary laýazymdy qyzmetke ornalasý ǵana emes, ult úshin, el úshin, halyq úshin aıanbaı ter tógý ekenin de eskertken edi. «Bizdiń maqsatymyz sizderdi laýazymdy qyzmetke taǵaıyndaý ǵana dep oılamańyzdar. Bul – eldi órkendetýge bel býǵan, sol úshin bar kúsh-jigerin jumsaıtyn azamattarǵa arnalǵan joba. Basty mindet – talantty jastardyń Qazaqstandy jańa belesterge kóterýine múmkindik berý. Eń bastysy – týǵan elińdi sheksiz qadirleý jáne oǵan adal qyzmet etý», dep eskertti Memleket basshysy. Iаǵnı bul joba rezervtegi jastar úshin tıimdi áleýmettik lıftke aınalady deýge bolady.
Eline eńbegin sińirýdi murat etken Nurbek Nurjanuly E.Bóketov atyndaǵy Qaraǵandy memlekettik ýnıversıteti, S.Seıfýllın atyndaǵy Qazaq agrotehnıkalyq ýnıversıteti, Soltústik Oral (Reseı) memlekettik agrarlyq ýnıversıteti, Prezıdent janyndaǵy Memlekettik basqarý akademııasy syndy birqatar joǵary oqý oryndarynda bilim aldy. Eńbek jolyn Qurylys jáne turǵyn úı-kommýnaldyq sharýashylyq isteri agenttigi Turǵyn úı qurylysy departamentiniń Turǵyn úı qurylysy baǵdarlamasyn iske asyrý basqarmasynyń sarapshysy qyzmetinde bastap, odan keıin Investısııalar jáne damý mınıstrligi Qurylys jáne turǵyn úı-kommýnaldyq sharýashylyq isteri komıtetiniń Sýmen jabdyqtaý jáne sý burý basqarmasynyń túrli qyzmetterinde jumys istedi. О́tken jyldyń mamyrynan bastap Indýstrııa jáne ınfraqurylymdyq damý mınıstrligi Qurylys jáne turǵyn úı-kommýnaldyq sharýashylyq isteri komıteti Kommýnaldyq sharýashylyq basqarmasynyń basshysy bolyp qyzmet etti.
Otyzǵa tolmaı orda buzǵan azamattyń qarym-qabiletin osydan-aq ańǵara berińiz. Alaıda Nurbek Nurjanuly osy jetken jetistikterimen shektelip qalǵan joq. О́tken jyly Prezıdenttik jastar kadrlyq rezervine qatysyp, baǵyn synap kórýge bel býdy. «Men de rezervke irikteýge qatysqan 13 myń úmitkerdiń qatarynda boldym. Bir-eki kúnde qajetti qujat jınap, onlaın rejiminde tapsyrdym. Bul rette, men uıymdastyrýshylardyń jumysyna alǵysymdy bildirgim keledi. Jobaǵa qatysýshylar úshin irikteý jumysy barynsha yńǵaıly uıymdastyryldy. Birinshiden, barlyq testileý, prezentasııalyq jobany usynyp, qorǵaý jumystary onlaın ótti. Tehnıkalyq qıynshylyqtar bolǵan kezde maǵan arnaıy maman túsindirip, kómektesti. Ekinshiden, «áleýetti baǵalaý» satysy ózdigimen ótken-ótpegen qatysýshylarǵa ári qyzyqty, ári paıdaly boldy dep oılaımyn. Baǵalaýdyń nátıjesi ózińdi damytý josparynyń negizi bola alady. Iаǵnı, úmitker baǵalary tómen parametrlerdi odan ári jetildirý boıynsha jumys isteıdi. Barlyq testiler zańnamany emes, biliktilikti ártúrli aspekti boıynsha baǵalaıdy. Birinshi test san jáne mátinge degen taldamalyq qabilettilikti saralaıdy. Odan ári baǵalaý deńgeıi tereńdeıdi, tipti jobaǵa qatysýshynyń adamgershilik qabileti táýelsiz sarapshylarmen baǵalanady», deıdi N.Serikov aǵynan jarylyp.
Jastar kadrlyq rezervi jas mamandarǵa memlekettik basqarý jáne kvazımemlekettik sektor júıesinde basshylyq laýazymdarǵa ornalasýǵa múmkindik beredi. Basshy laýazymdarǵa bos oryndar paıda bolǵan jaǵdaıda Prezıdenttik jastar kadrlyq rezervi rezervte turǵan adamdardyń kandıdatýrasyn qaraıdy. Bul óz kezeginde yntalandyrylǵan jastarǵa qyzmette ósý satylaryn paıdalaný men olardyń múldem basqa salalarǵa óz úlesin qosýǵa múmkindik beredi. «Iriktelgen jastarmen jeke tanysqan soń, men olardyń óte talapty, yntaly jáne eńbekqor adamdar ekenine kóz jetkizdim. Kóbisi sol kezdiń ózinde aıtarlyqtaı jetistikterge jetken bolatyn. Rezervte turǵan adamdardyń quramy ártúrli, onda memlekettik qyzmetten, ortalyq jáne jergilikti apparattardan kelgender de bar. Kvazımemlekettik sektor men jeke bıznes ókilderi de az emes. Bir sózben aıtqanda, alýan túrli qyzmet salalary qamtylǵan», deıdi N.Nurjanuly.
Nurbektiń aıtýynsha, taǵaıyndaýlar kezinde rezervte turǵan adamdarmen Prezıdent janyndaǵy Memlekettik basqarý akademııasynyń bazasynda biliktilikti arttyrý boıynsha turaqty jumys júrgiziledi. Sondaı-aq rezervte turǵan adamdardy salalyq problemalardy sheshý boıynsha ózindik «mı ortalyqtaryn» (Think tanks) qurý úshin Úkimet janyndaǵy jobalaý ofısterine jáne salalyq jumys toptaryna tartady.
«Prezıdenttik jastar kadrlyq rezervine turyp, sonyń arqasynda birneshe memlekettik organdar men kásiporyndardan bos laýazymdarǵa birqatar usynystar aldym. Meniń biliktilik talaptaryma sáıkes usynystar kóp tústi. Solardyń ishinde, «Turǵyn úı-kommýnaldyq sharýashylyǵyn jańǵyrtý men damytýdyń qazaqstandyq ortalyǵy» AQ basqarma tóraǵasynyń orynbasary degen usynys men úshin eń qolaıly boldy. Sebebi men turǵyn úı-kommýnaldyq sharýashylyǵy salasyndaǵy jumysty jalǵastyra alamyn dep oıladym. Sonymen qatar men jetekshilik etetin baǵyttar qyzyǵýshylyǵymdy týǵyzdy. Bul saladaǵy mańyzdy jumystar meniń bilimim men tájirıbemdi aıtarlyqtaı tolyqtyrady. Turǵyn úı-kommýnaldyq sharýashylyq salasyndaǵy keıingi reformalardy eskere otyryp, bul taǵaıyndaý osyndaı iri ózgerister kezinde men úshin bir mezgilde úlken syn bolǵanyn da jasyrmaımyn. Sebebi, bul reformalardy iske asyrýdyń mańyzdylyǵy týraly Memleket basshysy bıylǵy 1 qyrkúıektegi Qazaqstan halqyna Joldaýynda atap ótken bolatyn», deıdi basqarma tóraǵasynyń orynbasary.
Nurbektiń aıtýynsha, turǵyn úıdi basqarý jáne kútip-ustaý máselelerinde áli de aýqymdy jumystar atqarylatyn kórinedi. Ol úshin eseli eńbek pen qarymdy qabilet qajet. Al bul qasıetterdiń barlyǵyn Nurbek Nurjanulynyń boıynan tabýǵa bolady. Sondyqtan 13 myń adamnyń arasynda úzdikter qatarynan kórinip, úlken úmit arqalaǵan azamat bul salada da tabandy eńbek etýdi kózdep otyr. «Osy salany jetildirý boıynsha jumysymdy jalǵastyramyn degen josparym bar», deıdi Nurbek.