Daıarlyq deńgeıi joǵary

Qazir eki el arasyndaǵy jol qatynasy saıabyrsyp, shekara jal­pyǵa jabyq turǵanymen, arǵy-bergi bette týysy barlar men stýdentterge, emdelip, ota jasatýshylar men júk kólikterine jol ashyq. Qostanaı oblysynan Reseıge shyǵatyn bas qaqpa – «Qaıraq» shekara beketi qyz­metkerleriniń málimetinshe, shekaradan kúnine 1 myńǵa jýyq avtokólik, 1500-deı jolaýshy ótedi. Ary-beri aǵylyp jatqan transport quraldarynyń 90%-y – júk kólikteri. Bul kólikterdiń basym bóligi Qostanaıǵa soqpaı, aınalma jol arqyly ótkenniń ózinde, indettiń taralý qaýpi bar ekenin joqqa shyǵarýǵa bolmaıdy.

Qostanaı oblysynyń ákimi Arhımed Muhambetov keshe ǵana indettiń taralýyna jol bermeý jónindegi jedel shtab otyrysyn ótkizip, oblysta koronovırýsqa qarsy kúres sharalary josparly túrde júrgizilip jatqanyn aıtty. Alaıda aımaqta qabyldanyp jatqan saqtyq sharalaryna q­a­ramastan, turǵyndar men bir­qatar mekemeler tártipke boı­sunbaı otyr. Polısııanyń má­limetinshe, reıd sharalary barysynda oblys­ta 5 myńnan astam sanıtarlyq-epıdemııalyq talaptardy buzý deregi tirkelgen. Nátıjesinde, 1221 hattama toltyrylyp, jalpy so­masy 61,5 mln teńge bolatyn 841 aıyppul salynǵan.

6-qazannan bastap Jitiqara aýda­nyndaǵy «Jelqýar» she­ka­ralyq komendatýrasynda sa­­nıtarlyq beket qoıylyp, Reseı­den beri ótkenderdiń mindetti túr­de qyzýyn ólshep, saýaldamadan ótkizý sharalary qolǵa alyndy. Sondaı-aq Jitiqarada osy kúnnen bastap 40 oryndyq karantındik stasıonar jumys isteı bastady. Bul týraly aýdan basshysy áleýmettik jelidegi jeke paraqshasyna jazdy.

Jańa ınfeksııalyq ortalyq aýrýhananyń qurylysy aıaqtaldy

Qostanaıda az ýaqytta boı kó­tergen ınfeksııalyq aýrýhana 10 qazannan bas­tap ju­mys isteı bastaıdy. Ko­rona­vırýs juqtyrǵan naýqastar jata­tyn bul aýrýhananyń zamanaýı emdeý qurylǵylarymen qamtylǵan zerthanasy, dıagnostıka ortalyǵy, hırýrgııa bólimi bar. Infeksııalyq ortalyqtyń basty ereksheligi – mundaǵy naý­qastarǵa arnaıy qondyrylǵan planshetter arqyly qashyqtan baqylaý jasalady.

– Bul COVID-19-ǵa qarsy kú­res sharalary aıasynda salynǵan kópsalaly ınfeksııalyq aýrýhana. Mundaǵy árbir tósekte ottegige qosylý múmkindigi qaras­tyrylǵan. Sondaı-aq biz munda BMS júıesin engizdik. Iаǵnı dárigerler endi naýqastyń jaı-kúıin planshet arqyly qashyqtan-aq tekserip, qorytyndy shyǵara alady, – dedi joba jetekshisi Aıdan Narymbaev.

Infeksııalyq ortalyq 200 naý­qasqa shaqtalǵan. 20 oryndyq jan saqtaý bólimi, endoskopııalyq jáne ýltradybyspen emdeý bólimi taǵy bar.

– Munda bir oryndyq jáne eki, úsh oryndyq palatalar bar. Oblystyq aýrýhana dárigerler men med­bıkelerdi daıyndap jatyr. Injenerlik quram jasaq­talýda, – dedi densaýlyq saqtaý bas­qarmasynyń basshysy Vıaches­lav Dýdnık.

Jańa aýrýhanany taza jáne las aımaqqa bólip turatyn 8 modýl qarastyrylǵan. Orta­lyq ǵımarattarynyń qos qap­talynda bir-birine qarama-qar­sy ornalasqan eki esik bar. Koronavırýs juq­ty­ryp, aýrý­hanaǵa jetkizilgen naýqastar birinshi esikten kiredi. Al dertinen aıyqqan adamdar ǵımarattyń ekinshi jaǵyndaǵy basqa esikten shyǵady.

Bir qabatty aýrýhana ǵıma­ratynyń jalpy aýdany 6800 sharshy metr bolady. Aıdan Na­rym­baevtyń aıtýynsha, mun­da aýany tazartyp otyratyn keri jeldetkish ornatylǵan. Iаǵ­nı pa­latadaǵy las aýa dálizge shyq­paıdy. Aýrýhanadaǵy barlyq aýa arnaıy zararsyzdandyrý qu­rylǵysy arqyly súzgiden ótip, tazartylǵan kúıde dalaǵa bólinip shyǵady.

Aıyna 5 mln maska tigetin jańa kásiporyn ashylady

Qostanaıda birtaǵar betper­de shyǵaratyn óndiris orny iske qosylady. «Vadısa M» serik­testigindegi eki birdeı jańa jeli mınýtyna 160 medmaska tige alady. Aıyna 5 mln qorǵanysh quralyn shyǵarýdy kózdeıtin kásiporyn taıaýda ǵana alǵashqy ónimin shyǵardy. Seriktestiktiń bas esepshisi Valentına Gavrı­lenkonyń aıtýynsha, ár maskanyń baǵasy 40 teńgeniń tóńireginde. Qazir kásiporyn óndiristi qosýǵa ruq­sat beretin qujattaryn ret­tes­tirip jatyr. Sertıfıkatqa qol jet­kizgen soń, birden iske kiris­pek.

Ásirese oblys turǵyndaryn dári-dármekpen qamtamasyz etý asa mańyzdy. Jedel shtab janynan qurylǵan monıtorıng toby dárihanalarǵa preparattardyń kelip túsýin kún saıyn qadaǵalap, dári baǵasynyń qymbattamaýyn qatań baqylaýǵa alǵan. Oblysta turaqtandyrý qory qurylyp, dári-dármek jetkizýshilermen jumys jandandy. Sondaı-aq farmasevtıkalyq mekemelerge 300 mln teńge kóleminde qaı­tarymdy qarjylaı kómek kór­setilýde. Qazir oblysta COVID-19-dan emdeý hattamasyna enetin bakterııaǵa qarsy preparattar men antıkoagýlıant, kortıkosteroıd sııaqty dári-dármektiń eki aılyq qory bar. Pandemııanyń ekinshi tolqyny burq ete qalǵan jaǵdaıda paıdalanylatyn jeke qorǵanysh quraldary da jetkilikti.

– Negizgi dári-dármek qory úne­mi eselenip otyrady. Dári­hanalardy qajetti dárilik preparattarmen jáne jeke qorǵanysh qural­darymen tolyqtyrý jumys­tary jalǵasatyn bolady, – dedi A.Muhambetov.

7 mlrd teńge bólindi

О́ńir basshysynyń aıtýynsha, oblystaǵy COVID-19-ǵa qarsy kúres sharalary aıasynda bıyl medısınalyq jabdyqtar men sanıtarlyq avtokólikter satyp alýǵa shamamen 7 mlrd teńge bólingen. Munyń syrtynda, 79 jasandy tynys alý qurylǵysy satyp alynǵan, taıaýda Qazaqstanda shyqqan taǵy 85 JTA apparatyn jetkizý josparlanyp otyr. Búginde oblystaǵy emdeý mekemelerinde ókpege jasandy jolmen aýa jiberetin jalpy sany 267 apparat bar.

Densaýlyq saqtaý basqar­masynyń málimetinshe, qazan aıynyń sońyna deıin oblysqa 15 sıfrly rentgen júıesi jet­kiziledi. Onyń 10-y Qazaq­standa jasalǵan. Sondaı-aq 4 kom­pıýterlik tomograf, 1 MRT, sý tazartatyn 7 gemodıalız apparaty ákelinedi.

– Munyń syrtynda, 10 qa­zanǵa deıin 360 perfýzor men ın­fýzomattar, basqa da medı­sınalyq jabdyqtar men qandy gemosúzgiden ótkizetin 3 qurylǵy keledi, – dedi basqarma basshysy V.Dýdnık.

Aı­maqtaǵy 856 orynǵa ar­nalǵan 4 iri stasıonarda ottegi jelilerin montajdaý josparlanyp otyr. Búginde medısınalyq mekemelerdiń balansynda 600 ottegi konsentratory bar.

Jyljymaly dıagnostıkalyq keshenmen qamtamasyz etiledi

Dıagnostıkalyq medısınalyq keshenmen qamtylǵan arnaıy kólikter Qostanaı mashına jasaý zaýytynda qurastyrylady. Alǵashqy eki kóliktiń kilti Qos­tanaı jáne Fedorov aýdandaryna tabys etildi. Zaýyt mundaı medısınalyq qurylǵylarmen jabdyqtalǵan júzdegen avtobýs­ty elimizdiń ózge aımaqtaryna da jóneltpek. Densaýlyq saqtaý basqarmasynyń baspasóz hatshysy Ksenııa Jylqybaevanyń sózinshe, mundaı avtobýstar Qara­ǵandy oblysynan ózge óńir­lerde joq eken.

Zaýyttyń arnaıy kommer­sııalyq tehnıka jobasynyń jetekshisi Alekseı Levashkın jyl­jymaly dıagnostıka keshen­derine taıaýda ǵana tapsyrys túskenin aıtady.

– Tamyz aıynda biz Densaýlyq saqtaý mınıstrliginen zamanaýı jyljymaly medısınalyq keshenniń jobasyn ázirleýge tapsyrys aldyq. Mine, kóp keshikpeı «Yutong» seriktesimen týrıstik avtobýs bazasynda zamanaýı jyljymaly keshendi usynyp otyrmyz. Medısınalyq keshen «Yutong» markaly qa­laaralyq avtobýsynyń negizin­de qurastyryldy. Avtonomdy jylytý júıesi, kondısıoneri bar. Avtobýsta jeti kabınet ju­mys isteıdi. Onyń ishinde tera­pııalyq jáne akýsherlik-gıne­kologııalyq kabınetter arnaıy qurylǵylarmen jabdyqtalǵan. Qosymsha zerthana ortalyǵy da bar, – dedi A.Levashkın.

Jyljymaly keshende qan saraptamasyn saqtaýǵa arnalǵan tońazytqysh, sozylmaly juqpaly emes aýrýlardy erte anyqtaıtyn keshendi qurylǵy ornalasqan. Em-dom jasaýǵa qajetti múmkindiktiń bári qarastyrylǵan.

– Búginde Qostanaı aýdanynda 70 myńnan astam halyq turady. Biz baratyn eń shalǵaı aýyl Tobyl qalasynan 120 shaqyrym qashyqtyqta ornalasqan. Buryn biz shalǵaı aýyldarǵa júk kóligi­men baratynbyz. Qysta tońyp jetemiz jáne naýqastardy tekse­retin qurylǵylar sany da shek­teýli bolatyn. Al bul kólik­tiń basty ereksheligi, munda tur­ǵyndarǵa kóptegen zertha­nalyq tekserýler júrgizýge bolady. Rentgen men flıýorografııadan ótkizýge de múmkindik bar. Oǵan EKG men ÝDZ-ny qosyńyz, – dedi aýdandyq aýrýhananyń bas dárigeri Sarlybek Meshanov.

Zamanaýı jyljymaly dıag­nostıkalyq keshenniń uzyn­dyǵy – 12 metr. Medavtobýstyń múm­kindigi shekteýlilerge arnalǵan jyljymaly satysy bar.

Taıaý kúnderi mundaı keshender taǵy 10 aýdanǵa jóneltilmek.

Qostanaı oblysy