Petropavl qalasynyń 48 jasar áıel turǵyny polısııaǵa qońyraý shalyp, úıinde kisi óltirilgenin habarlaǵan. Mundaı tótenshe oqıǵa eldiń bárin eleń etkizip, oqıǵa ornyna Ekinshi polısııa bóliminiń qyzmetkerleri shuǵyl jiberiledi, dep habarlaıdy Egemen.kz
Adam ómirimen oınaýǵa bolmaıdy. Onyń ústine kisi óltirilýi qylmystyq kodeks boıynsha eń aýyr qylmys bolyp sanalady. Qasaqana kisi óltirýshilerdiń jazasy da eń aýyry. Alaıda Petropavl qalasynda osyndaı qylmyspen oınaıtyn bir áıel shyǵypty.
Quramynda tergeýshi, krımınalıst t.b. bar jedel top tótenshe oqıǵanyń sebebin anyqtaý, kisi óltirýshi qylmyskerdi ustaý, tekrgeý maqsatymen barlyq jumystaryn tastap, shuǵyl jolǵa shyqqan. Alaıda olar orta jolǵa barǵanda dabyl berýshi áıeldiń ózi habarlasyp, shaqyrtýdan bas tartatynyn aıtqan.
"Áıel ózi qońyraý shalyp, aqparatty joqqa shyǵarǵan. Atalǵan mekenjaı boıynsha ýchaskelik polısııa ınspektory jiberildi", dedi Petropavl qalasy PB Ekinshi polısııa bóliminiń bastyǵy Rýslan Syzdyqov.
Polısııa kapıtany Janat Muhamedjanov páterde masań kúıdegi áıel men eki er adamnyń bolǵanyn anyqtaǵan. Áıel otyrysta adam ólimi týraly ázildep, kóńil kótermekshi bolǵan. Áıeldiń mundaı áreketke buǵan deıin de barǵany belgili boldy. Naýryz aıynda da ol osylaı "ázildemek" bolyp, Ákimshilik quqyq buzýshylyq kodekstiń "Arnaýly qyzmetterdi kórineý jalǵan shaqyrý" baby boıynsha jaýapqa tartylyp, 80 myń teńgeden astam aıyppul tólegen eken. Endigisi ne ekenin polısııa bile almaı otyr. Oǵan polısııa oıynshyq bolyp kórinetin bolýy kerek.
Jas bala emes, jasamys áıeldiń osyndaı qylyqtarǵa barýynyń ózi – túrli kúdikter týdyrady. Álde oǵan mundaı buzýshylyq úshin tólegen aıyppul az kórindi me eken? Shynynda, mundaı buzýshylyqtardy usaq demeı, tıimdi jaza qoldaný kerek qoı. Polısııamen ázildep, mazaq qylyp, ótirik aıtyp, oınamaq bolǵandar demokratııalyq damýy barynsha joǵary damyǵan elderde de qatań jazaǵa tartylady. Máselen, osyndaı ótirik dabyl úshin Germanııada adam eki jylǵa deıin bas bostandyǵynan aıyrylýy múmkin.
Al Amerıka mundaıdy "svatıng" dep ataıdy, ondaıdy jasaǵandar 10 myń dollar kóleminde aıyppul tóleıdi. Al izgilendirýdi pir tutqan bizdiń eldegi aıyppul dollarǵa shaqqanda bar bolǵany 200 bolyp otyr. Osy máseleni zańdarǵa tolyqtyrýlar men ózgerister engizgende eskerý kerek sııaqty.