Qazaqstan Respýblıkasynyń Sıfrlyq damý, ınnovasııalar jáne aeroǵarysh ónerkásibi mınıstrligi men Qazaqstan Respýblıkasynyń Densaýlyq saqtaý mınıstrligi koronavırýstyq ınfeksııanyń taralýyn baqylaý jáne juqtyrý oshaqtaryn ýaqtyly oqshaýlaý maqsatynda "Saqbol" mobıldi qosymshasyn usyndy, dep habarlaıdy Egemen.kz mınıstrliktiń baspasóz qyzmetine silteme jasap.
Qosymsha habarlama fýnksııasyn iske qosý arqyly COVID-19 úshin oń nátıje kórsetken azamatqa sońǵy 14 táýlik boıy eki metrden az qashyqtyqta jáne 15 mınýttan astam ýaqyt ishinde qosymshanyń basqa paıdalanýshylarymen baılanysy týraly jasyryn túrde eskertýge múmkindik beredi.
Basqa qurylǵylarmen ózara is-qımyl jazbalaryn saqtaý úlgisi shıfrlanǵan bolady.
"Saqbol" qosymshasyn qoldanýǵa, birinshiden smartfonǵa júktep, odan keıin shıfrlanǵan derekter beriletin Bluetooth fýnksııasyn qosý kerek. Qosymsha IOS jáneAndroid-ta qoljetimdi.
Baǵdat Mýsınniń aıtýynsha, qosymsha azamattardy juqtyrý qaýpi bar týraly ýaqtyly habardar etýge jáne ınfeksııanyń taralýyn edáýir azaıtýǵa múmkindik beredi.
"Barlyq qazaqstandyqtardy osy qosymshany belsendi túrde paıdalanýǵa, muqııat jáne jaýapty bolýǵa shaqyramyn. Osylaısha, indet oshaqtaryn barynsha oqshaýlap, Covid-19-nyń taralýyna jol bermeımiz. Biz halyq aldyndaǵy jaýapkershilikti túsinemiz jáne barlyq jeke derekter qosymshada barynsha shıfrlanǵan etip jasadyq. Bul qosymsha paıdalanýshylardyń basym túrde jasyryn bolýyn qamtamasyz etedi", dep túsindirdiQazaqstan Respýblıkasynyń Sıfrlyq damý, ınnovasııalar jáne aeroǵarysh ónerkásibi mınıstri Baǵdat Mýsın.
"Qosymshanyń jumysy sol baǵdarlama ornatylǵan basqa qurylǵylarmen baılanysta bolǵan adamdardy jasyryn túrde izdeýge baǵyttalǵan. Ony paıdalaný úshin tirkeý qajet emes. Baǵdarlama jeke derekterdi nemese ornalasqan jer týraly derekterdi jınamaıdy jáne jibermeıdi. Habarlandyrýdy iske qosqan kezde, baǵdarlama avtomatty jáne jasyryn túrde bul týraly basqa paıdalanýshylarǵa habarlaıdy. Osylaısha, osy qosymsha azamattardyń saqtyǵyn arttyrýǵa jáne juqtyrǵan adamdarmen baılanysy týraly ýaqytyly habardar etýge kómektesedi", dep tolyqtyrdy Qazaqstan Respýblıkasynyń Densaýlyq saqtaý mınıstri Alekseı Soı.
Habarlamany alǵan paıdalanýshylar qosymshada Qazaqstan Respýblıkasy Densaýlyq saqtaý mınıstrliginiń budan ári is-qımyldary týraly usynymdarymen tanysa alady.
Budan basqa, paıdalanýshylarǵa yńǵaıly bolý maqsatynda qosymshaǵa ózin-ózi anyqtaýdyń COVID-19, i-Doctor, i-Teka resmı bottary, sondaı-aq Qazaqstan boıynsha COVID-19 ózekti statıstıkasy sııaqty servıster biriktirilgen.
"Saqbol" qosymshasyn ázirleýshi "Ulttyq aqparattyq tehnologııalar" AQ bolyp tabylady.