Senator Álimjan Qurtaev beısenbi kúni plenarlyq otyrysta agrarlyq saladaǵy eń mańyzdy máselelerdiń birin kóterdi. Senator 10-15 kúnde egin jınaýǵa daıyn otyrǵan Túrkistan oblysyndaǵy maqta egýshi dıhandardyń qıyn jaǵdaıyn úkimet basshysyna jetkizdi, dep habarlaıdy Egemen.kz Senattyń baspasóz qyzmetine silteme jasap.
"Tıisti oryndarmen maqta baǵasy rettelip, dıqandardyń shyǵynǵa batyp qalmaýyn qadaǵalaýdy tapsyrýyńyzdy suraımyz", – deıdi depýtat.
Senatordyń aıtýynsha, óńirdegi maqta zaýyttary monopolıster sııaqty. Iаǵnı, zaýyt basshylyǵy maqta baǵasyn ózderi bekitedi, al dıhandardyń buǵan kónbeýge amaly joq. Sebebi, maqtany zaýyttan basqa eshkim qabyldamaıdy.
Depýtattyń saýalynda Lıverpýl maqta bırjasyndaǵy baǵaǵa táýeldilik te sharýalardyń qaltasyna áser etetini aıtylǵan. Dıqandar 40-50 gradýs aptaptyń astynda erte kóktemnen qońyr kúzge deıin ósirgen osy ónimin shıtin ǵana aıyratyn maqta zaýyttary arqyly shetelderge sý tegin satyp keldi.
"Bylaı aıtqanda, ózderi ósirgen aq maqtadan daıyndalǵan ónim Qazaqstanǵa 5-6 ese qymbat baǵaǵa keledi", – deı kele, senator tıisti oryndarmen maqta baǵasynyń rettelýin, dıqandardyń shyǵynǵa batyp qalmaýyn qadaǵalaýdy tapsyrýdy surady.