Premer-Mınıstr Asqar Mamın Máskeý qalasyna jumys sapary aıasynda Reseıdiń ortalyq memlekettik organdarynyń, memlekettik korporasııalary men qarjy-bank qurylymdarynyń basshylyǵymen kezdesýler ótkizdi, dep habarlaıdy Egemen.kz Premer-Mınıstrdiń baspasóz qyzmetine silteme jasap.
RF ónerkásip jáne saýda mınıstri D. Mantýrovpen ótken kezdesýde óńdeý ónerkásibindegi (mashına jasaý, metall óńdeý, hımııa ónerkásibi jáne t. b.) birlesken jobalardy iske asyrýdyń jaı-kúıi men keleshegi, sondaı-aq ekijaqty formatta jáne EAEO aıasynda saýdany keńeıtý máselesi talqylandy.
Sberbankke baryp, basqarma tóraǵasy G. Grefpen kezdesý kezinde QR Úkimetiniń basshysy jasandy zerde, jıyntyqty esepteýler men robot tehnıkasy salasyndaǵy, onyń ishinde densaýlyq saqtaý, bilim berý, logıstıka, korporatıvtik jáne memlekettik basqarý salalarynda qoldanylatyn ozyq jobalarmen tanysty.
Taraptar atalǵan salalardaǵy, sondaı-aq bilim berýdi sıfrlandyrýdaǵy jáne «Astana» halyqaralyq qarjy ortalyǵynyń platformasynda AT-mamandardy birlesip daıarlaýdaǵy yntymaqtastyqtyń perspektıvalaryn qarastyrdy.
VEB.RF memlekettik damý korporasııasynyń tóraǵasy I. Shývalovpen ótken kezdesýde EAEO keńistiginde birlesken ınvestısııalyq jobalardy iske asyrý, ekonomıkany tehnologııalyq jańǵyrtý jáne sıfrlandyrý, shıkizattyq emes sektordaǵy saýdany keńeıtý jáne t. b. máseleler talqylandy. «Rosgeologııa» basqarma tóraǵasy S. Gorkovpen, «Rosatom» memlekettik korporasııasynyń bas dırektory A. Lıhachevpen, «Roskosmos» bas dırektory D. Rogozınmen ótken kezdesýlerde eki eldiń geologııa, energetıka jáne ǵarysh salalaryndaǵy yntymaqtastyǵynyń ózekti máseleleri talqylandy.
Saparǵa QR Premer-Mınıstriniń birinshi orynbasary Á. Smaıylov, Strategııalyq josparlaý jáne reformalar jónindegi agenttiktiń tóraǵasy – AHQO basqarýshysy Q. Kelimbetov, QR sıfrlyq damý, ınnovasııalar jáne aeroǵarysh ónerkásibi mınıstri B. Mýsın, QR-nyń RF-tegi Tótenshe jáne О́kiletti Elshisi E. Kósherbaev jáne t. b. qatysty.