Aldaǵy jeksenbi kúni fýtboldan Ulttar lıgasynyń úshinshi jáne tórtinshi týr oıyndary ótedi. S dıvızıonynda synǵa túsetin Qazaqstan quramasy 11 qazanda Almatydaǵy Ortalyq stadıonda Albanııa quramasymen baq synaıdy. Al 15 qazanda syrt alańda Belarýs fýtbolshylarymen kezdesip, ese qaıtarýdyń qamyn oılastyrady.
Jalpy, Qazaqstan ulttyq quramasynyń bas bapkeri Mıhal Bılek ulttyq quramaǵa shaqyrǵan osy jolǵy fýtbolshylaryn ótken aımen salystyrar bolsaq, asa kóp ózgeris jasamaǵan. Dese de, qazan aıynyń basynda Albanııa jáne Belarýs quramasymen ótetin oıynǵa shaqyrylǵan tizimnen jankúıerler eki jańa fýtbolshynyń esimin baıqaǵan bolýy kerek. Biri Belarýs chempıonatynyń «Rýh» klýbynda dop tebetin jartylaı qorǵaýshy – Vladıslav Vasılev bolsa, ekinshisi ishki chempıonatta óner kórsetetin «Jetisý» klýbynyń shabýylshysy – Aıbar Jaqsylyqov.
23 jastaǵy Vasılevtiń «ataqty» «Ole Brazıl» mektebiniń túlegi ekenin jankúıerlerdiń biri bilse, biri bile bermeıdi. 1997 jyly Qaraǵandy qalasynda týǵan Vladıslav jergilikti «Shahter» klýbynyń tárbıelenýshisi sanalady. «Kenshiler» klýbynyń jastar quramynda óner kórsetip júrgende 2013 jyly Brazılııada aıaqdoptyń qyr-syryn meńgerýge múmkindik alady. Peleniń otanynan dopty urshyqsha ıirýdi meńgerip kelgennen keıin de Vladıslav «Shahterdiń» jastar komandasynda oınady. 18 jasynda erekshe talantymen daralanyp, bapkerlerdiń kózine túsken ol 2015 jyly negizgi quramǵa shaqyrtý aldy. 2017 jylǵa deıin Premer-lıgada týǵan qalasynyń namysyn qorǵaǵan Vasılev barlyǵy 23 kezdesýde bir márte gol soqty.
2018 jyly shetelde baǵyn synap kórýdi uıǵarǵan jerlesimiz Belarýs chempıonatynyń ortanqol komandasy sanalatyn «Energetık-BGÝ» klýbymen kelisimshartqa otyrdy. Bir jyl ishinde 43 oıynǵa qatysqan ol 12 gol soqty. 2019 jyly Belarýs chempıony atanǵan «Dınamo-Brest» klýbyna aýysyp, chempıon klýbtyń quramynda júrip 8 kezdesý ótkizip úlgerdi. Alaıda 2020 jyldyń aqpanynda «Dınamo» Vasılevti Brestiń ekinshi klýby sanalatyn «Rýh» komandasyna jalǵa berdi. Ázirshe 23 oıyn ótkizgen otandasymyz alty márte qarsylastyń qaqpasyn dál kózdegen. Osyndaı tabysty oıynynyń arqasynda Vladıslav Vasılev bas bapker Mıhal Bılektiń nazaryna iligip, ulttyq quramaǵa shaqyrtý aldy. Dese de, Vasılevke ulttyq quramada oınaý tańsyq emes. О́ıtkeni ol buǵan deıin de ár jyldary Qazaqstannyń jastar quramynda da óner kórsetip úlgergen.
Al 24 jastaǵy Taldyqorǵan qalasynyń týmasy Aıbar Jaqsylyqov ta ulttyq quramaǵa birinshi márte shaqyrtý alyp otyr. Aıbar da Vladıslav sekildi jergilikti klýbtyń jastar quramasynda júrip, negizgi komandada oınaýǵa múmkindik alǵan. 2018 jyldan bastap «Jetisý» klýbynda Qazaqstan birinshiliginde óner kórsetetin Jaqsylyqov 2017 jyly «Jetisý-B» quramynda 13 gol soǵyp, klýbtyń úzdik surmergeniniń biri atandy. Oıyny jyldan-jylǵa alǵa ilgerilep, tájirıbesi tolysyp kele jatqan Aıbardyń bıylǵy nátıjesi de jaman emes. Premer-lıga oıyndarynyń 10-týrynda «Shahtermen» ótken matchtyń ekinshi taımynda alańǵa shyqqanyna qaramastan, qarsylas komandanyń qaqpasyna eki gol soǵyp, «Jetisýdyń» jeńiske jetýine súbeli úles qosty.
Sondaı-aq quramaǵa shaqyrtý alǵan oıynshylardyń tiziminde shetelde oınaıtyn fýtbolshylarymyzdyń qatary kóbeıgeni kisi qýantady. Máselen, osy jolǵy quramǵa alty legıonerimiz shaqyrtý alǵan. Atap aıtar bolsaq, qorǵaýshy Marat Bystrov («Ahmat», Reseı») pen Iаn Vorogovskıı («Beershot», Belgııa), jartylaı qorǵaýshylar Baýyrjan Islamhan («Ál-Aın», BAÁ), Baqtıer Zaınýtdınov (SSKA, Reseı), Islambek Qýat («Hımkı», Reseı) jáne joǵaryda biz atap ketken Vladıslav Vasılev («Rýh», Belarýs). О́kinishke qaraı aldaǵy eki matchta Iаn Vorogovskıı ulttyq quramaǵa kómektese almaıdy. Onyń koronavırýs bar-joǵyn anyqtaıtyn tapsyrǵan testi oń nátıje kórsetken. Bas bapker onyń ornyna «Tobyldyń» qorǵaýshysy Dmıtrıı Mıroshnıchenkony shaqyrǵanyn aıta keteıik.
Endi qarsylastarymyzǵa toqtalsaq. Albanııa quramasy qazaqstandyq jankúıerlerge de, fýtbolshylarǵa da jaqsy tanys. Eki eldiń oıynshylary jasyl alańda eki ret jolyǵyp, ókinishke qaraı ekeýinde de Balqan túbeginiń eli jeńis toıyn toılaǵan. Albanııa men Qazaqstan quramasynyń alǵashqy «tanystyǵy» sonaý 2004 jyly bastalǵan. 2006 jyly Germanııada ótken álem chempıonatynyń irikteý kezeńinde bir topta óner kórsetken quramalardyń alǵashqy oıyny Qazaqstanda ótip, qonaqtar 1:0 esebimen basym túsken-di. Araǵa jyl salyp Albanııaǵa sapar shekken Qazaqstan quramasynyń fýtbolshylary Balqan túbeginen taǵy da taýy shaǵylyp qaıtty. Bul joly jerlesterimiz 2:1 nátıjesimen ese jibergen. Qazaqstandyqtardan jalǵyz goldy Maksım Nızovsev soqqanyn aıta keteıik. Endi Ulttar lıgasy aıasynda joldary túıisken eki qurama úshinshi ret jasyl alańda kim myqtyny anyqtaıdy. Endeshe, jerlesterimiz er kezegi úshke deıin degen máteldi burynǵylar beker aıtpaǵanyn dáleldeıdi dep senemiz.
Italııalyq maman Edoardo Reıa baptaıtyn Albanııa quramasy Eýropanyń TOP-5 chempıonatynda oınaıtyn legıonerlerden jasaqtalǵanyn eskersek, ońaı shaǵylatyn jańǵaq dep aıta almaımyz. Álemdik reıtıngte 66-orynda turǵan qarsylastarymyz 2016 jyly Fransııadaǵy Eýropa chempıonatynyń toptyq kezeńinde óner kórsetkenin jankúıerler áli umyta qoımaǵan shyǵar. Dese de, Albanııanyń keıingi oıyndardaǵy nátıjeleri asa máz emes. Byltyr Eýropa chempıonatynda Andorramen (2:2) teń túsip, jýyrda Ulttar lıgasynyń alǵashqy týrynda Qazaqstannan jeńilgen Lıtvadan óz alańynda 1:0 esebimen utyldy.
Sonymen qatar Qazaqstanmen ótetin oıynǵa Albanııa quramasynyń Italııa komandalarynda dop tebetin birqatar oıynshysy koronavırýsqa baılanysty qatysa almaıdy. Albanııalyq BAQ-tyń habarlaýynsha, Etrıt Berısha, Ilber Ramadanı, Florıan Kamberı, Lındon Selahı jáne Klaýs Gıasýlaǵa Italııadan shyǵýǵa ruqsat berilmegen. Sondaı-aq densaýlyǵyna baılanysty quramanyń negizgi qaqpashysy Tomas Strakoshı men qorǵaýshy Ion Mersınaıa da oınamaıdy. Matchqa deıin osyndaı azdaǵan basymdyqqa ıe bolǵan Qazaqstan quramasy aldaǵy oıynda qalaıda jeńýi kerek. Onyń ústine match óz alańymyzda ótedi.
Albanııa quramasynan keıin jerlesterimiz eski de jańa qarsylasymyz Belarýs eline attanady. Ázirge «aqorystar» quramasy Qazaqstan úshin alynbas qamalǵa aınaldy. Búginge deıin ótkizgen úsh resmı matchta Belarýs fýtbolshylary jeńiske jetse, 2011 jylǵy joldastyq kezdesýde otandastarymyz áreń degende teń túsken. Osydan bir aı buryn Almatyda ótken matchta da Qazaqstan quramasy teń oıynǵa laıyq óner kórsetip edi. Alaıda fýtbolshymyzdyń qateligin utymdy paıdalanǵan qarsylastarymyz óz eline jeńispen oraldy. Endi buǵan deıingi oıyndardy aıtpaǵannyń ózinde, keshegi jeńilistiń esesin osy joly qaıtarý kerek. Ony fýtbolshylardyń ózderi de jaqsy túsinedi.
Qurama kapıtany Baýyrjan Islamhan da eki oıynda jeńiske jetip, alty upaı oljalaý basty mindetimiz dep esepteıdi. «Daıyndyq joǵary deńgeıde ótip jatyr. Eshkim de jaraqat alǵan joq. Komanda jaqsy jaǵdaıda, barlyǵynyń kóńil kúıi tamasha. Eger topta birinshi oryndy ıelengimiz kelse, aldaǵy eki oıynda da jeńiske jetýimiz kerek. Jeńis úshin qolymyzdan kelgenniń bárin isteımiz», dedi kapıtan.
Eske sala keteıik, 11 qazandaǵy Qazaqstan men Albanııa arasyndaǵy oıyn keshki saǵat 19:00-de, al syrt alańda ótetin Belarýs pen Qazaqstan quramalarynyń kezdesýi 15 qazannan 16-syna qaraǵan túni 00:45-te bastalady. Eki oıyndy da Qazsport telearnasy tikeleı efırde kórsetedi.